Unha ducia de tarxetas postais históricas que se poden ver na Galiciana

Rúa Urzaiz (Vigo)

Esta postal amosa a viguesa Rúa Urzaiz (chamada José Antonio durante a ditadura), co desaparecido Cine Odeón, derrubado en 1969

O Berbés (Vigo)

Sen movernos de Vigo, vemos agora o Berbés, nunha imaxe aínda máis antiga

Baiona

Este é o aspecto que presentaba a Rúa Porta da Vila de Baiona nas primeiras décadas do século XX

Redondela

A 'Plaza del Pescado' de Redondela situábase onde agora se atopa a Praza de Abastos da localidade, baixo o Viaduto de Pontevedra, de 1884, polo que pasaba o tren que unía Vigo e A Coruña

Vilagarcía de Arousa

A Casa de Baños La Concha de Arosa, construída a carón do mar en 1886 nunha estrutura de madeira que incluía 75 habitacións para os usuarios e usuarias deste balneario, foi derrubada a finais dos anos 40. Entre outros motivos, pola vinculación coa Fronte Popular do propietario da instalación. Pero durante décadas foi un dos principais atractivos de Vilagarcía de Arousa.

Marín

Moito cambiou o litoral de Marín, como proba esta postal de comezos do século XX e que amosa as construcións tradicionais, en boa medida desaparecidas na actualidade

Sanxenxo

E se Marín cambiou, tamén o fixo Sanxenxo. Enormemente, mesmo a pesar de que esta imaxe é máis recente. O actual centro turístico era, ata hai poucas décadas, unha pequena vila mariñeira

A Tablada (Pontevedra)

O río da Tablada, parte do Gafos que na actualidade se atopa cuberta, era empregado nas primeiras décadas do século XX para lavar a roupa e as súas ribeiras, para poñela a clarear.

Balneario Cabreiroá (Verín)

Balnearios había moitos, entre eles o de Cabreiroá, en Verín, que contaba mesmo cun tranvía de tracción animal que o conectaba co centro da localidade. Comezou a funcionar en 1908 e cubría unha distancia de 2,4 quilómetros de vías polas que tamén se transportaba a auga embotellada para a súa distribución.

Ribadeo

A Praza do Campo era o nome que orixinalmente tiña a Praza de España de Ribadeo, nun momento en que neste espazo, extramuros, aínda era ocupado polo parque municipal.

Lugo

A cidade de Lugo si ten praia. O Club Fluvial estaba ateigado de xente neste día de verán. Dende aí se podía ver, ao lonxe, o inicio da urbe e o pavillón municipal de deportes, xa construído.

Betanzos

Imaxe histórica da Praza dos irmáns García Naveira, en Betanzos, aínda sen a estatua dos filántropos, construída inicialmente no Parque do Pasatempo.

Ferrol

A Praza de Armas de Ferrol era inicialmente máis grande, sen a Casa do Concello que a partir de 1953 ocupou o seu lateral máis elevado. A outra gran diferenza márcaa o Obelisco de Churruca (en homenaxe ao brigadier Cosme Churruca, morto na Batalla de Trafalgar), instalado aquí inicialmente sobre unha fonte de uso público e que na actualidade está nos xardíns de San Francisco.

A Pobra do Caramiñal

A Rúa Gasset da Pobra do Caramiñal (hoxe Estrada Gasset ou AC-305) é unha das vías principais da localidade e recibe o seu nome en homenaxe ao avogado, diplomático e escritor local Gerardo Gasset Neira (1899-1969). Ocupou postos diplomáticos no Perú e Portugal e colaborou en xornais como El Imparcial, Galicia e El Pueblo Gallego.

A Fundación RIA está a realizar un traballo de análise e propostas en relación á estrada AC-305 para devolverlle o seu carácter de "rúa".

Herbón (Padrón)

Esta fermosa imaxe amosa -á beira do río Ulla- o convento franciscano de San Antón de Herbón (Padrón), daquela Colexio Seráfico, onde se formaban as persoas que aspiraban a ingresar na orde franciscana. 

Santiago de Compostela

Esta imaxe histórica de Santiago amosa o período no que o centro da Praza do Obradoiro (daquela Praza de Alfonso XII) estaba ocupado pola estatua de Montero Ríos que hoxe se sitúa en Mazarelos. A estatua foi inaugurada en 1916, froito dun proxecto iniciado en 1905 polo daquela alcalde da cidade para homenaxear o político local, que nese momento ocupaba a Presidencia do Consello de Ministros. Porén, o polémico monumento durou pouco nese lugar e en 1928 foi trasladado.

A Coruña

O porto da Coruña foi, xunto co de Vigo, o lugar dende o que saíron durante décadas centos de miles de galegos e galegas cara á emigración a América. Unha parte importante destas postais cruzaban o Atlántico para contar e amosar a terra que deixaran atrás.  

A Coruña

Nesta imaxe obsérvase unha Coruña en transformación. O Ensanche (a imaxe está tirada na esquina da rúa Ferrol co Camiño Novo -hoxe Juan Flórez-) estaba en construción e esta zona era aínda o extrarradio da cidade.