A xuíza di que tras unha primeira venda en 2019 aos acusados por 1 euro, estes volveron vender as fábricas en 2020 a unha firma creada por un deles por 13 millóns que saíron "da tesourería das propias empresas que se ían vender"
A Audiencia Nacional vén de rematar a investigación sobre a venda irregular en 2019 das antigas plantas de Alcoa na Coruña e Avilés e propón xulgar oito persoas por delitos de apropiación indebida, insolvencia punible e constitución ou pertenza a organización ou grupo criminal. A xuíza considera que os acusados tiveron intención de descapitalizar as factorías e "desviar os seus activos cara ao seu patrimonio persoal" e estruturas societarias creadas "para apoderarse deles".
A orixe da causa está no proceso de venda por parte de Alcoa Inespal SL das súas fábricas na Coruña e Avilés ante a difícil situación económica na que se atopaban. A venda das plantas, di a xuíza no seu auto, produciuse en dúas fases. O 31 de xullo de 2019 Alcoa vendeu o 100% dos dous centros de produción polo prezo simbólico de 1 euro ás empresas Alu Holding AC Spain SLU e Alu Holding AVL 2019 Spain SLU, que foran creadas pouco antes pola sociedade Blue Motion Technologies, propiedade dun grupo suízo.
Nun segundo momento, o 8 de abril de 2020, Blue Motion Technologies, "incumprindo os termos do acordo de venda, volveuna vender por 13 millóns de euros á sociedade española System Capital Company, que tamén fora constituída pouco antes por un dos investigados". Os 13 millóns, di a xuíza, saíron "da tesourería das propias empresas que se ían vender", nunha operación deseñada polos investigados aos que se propón xulgar.
A instrución tamén revelou que antes da segunda venda un dos investigados ordenou transferencias por preto dun millón de euros desde as contas de Alu Ibérica a contas suízas de empresas que controlaba.
Tras a segunda venda, di a xuíza, "comeza a desenvolverse unha concatenada e reiterada sucesión de feitos que terían como obxectivo a descapitalización de despatrimonialización das entidades e os seus iniciais activos e o seu desvío e canalización, ben cara ao patrimonio persoal dos investigados, ben ás estruturas societarias que foron configurando ad hoc para apoderarse de aqueles" con prexuízo dos traballadores e acredores das empresas. Entre outras actuacións, interpuxéronse sociedades na compra de produtos para incrementar artificialmente o seu prezo, simuláronse préstamos, desviouse diñeiro a mercantís controladas polos investigados ou asignouse un soldo "desorbitado" a outra das investigadas.
Os investigados, di a xuíza, investiron os cartos obtidos en criptomoedas para a súa posterior legalización.
Todas estas actuacións mantivéronse ata que a Audiencia Nacional interveu as fábricas en 2021 e nomeou un administrador xudicial que decidiu pedir o concurso de acredores das empresas.
Agora, unha vez ditado o auto co que a xuíza dá por rematada a investigación, no que se acorda o arquivo das actuacións contra sete persoas e contra Alcoa Inespal, a Fiscalía e as partes poden recorrer ou formular os seus escritos de acusación.
