A planta de PSA en Vigo pechará desde o 18 de marzo

Planta de PSA na cidade de Vigo CC-BY-SA CIG

Hemeroteca

O Grupo PSA vén de anunciar o peche gradual de todas as súas plantas en Europa pola crise do coronavirus. A de Vigo deixará de producir este martes e pechará o mércores, 18 de marzo, segundo indicou a empresa, que concretou que a medida estará vixente ata o 27 desde mes.

O grupo irá pechando ao longo desta semana todas as plantas debido aos casos graves de coronavirus, aos problemas de suministro e á caída dos mercados

Nun comunicado expón que "debido á aceleración observada nos últimos días de casos graves" da enfermidade provocada polo coronavirus en lugares "próximos a determinados lugares de produción", as "interrupcións" no suministro de grandes provedores e á "repentina caída" nos mercados automobilísticos, o presidente do comité executivo decidiu o peche das plantas de produción de vehículos seguindo un calendario. 

Cadea de produción na planta de PSA en Vigo © PSA

Os primeiros ceses de actividade foron os das instalacións de Madrid e Mulhouse (Francia), o luns. O martes é a quenda de Zaragoza, tres plantas francesas (Rennes, Poissy e Sochaoux), dúas en Alemaña (Eisenach e Rüsselsheim), unha en Reino Unido (Ellesmere Port) e outra en Polonia (Gliwice). O mércores pecharán, xunto con Vigo, as fábricas de Mangualde (Portugal) e Hordain (Francia) e o xoves serán a de Luton (Reino Unido) e a de Trnava (Eslovaquia).

No caso da planta viguesa, a dirección trasladoulles aos sindicatos que o plan é que a produción termine este martes. A liña principal deixa de producir ás 14:00 horas, pero o peche será progresivo para facer labores de baleirado. Tamén irán deixando de traballar gradualmente os talleres de ferraxe e pintura, segundo informaron conxuntamente UGT, CCOO, CIG e CUT. A empresa indicou tamén que haberá un teléfono para darlle información ao persoal nesta situación e que, se alguén dá positivo en coronavirus, débeo comunicar.

O peche das instalacións mecánicas irase axustando de forma coordinada e os procedementos específicos de cese da actividade serán responsabilidade do equipo directivo en cada unha das sedes, "en coordinación cos socios locais".

Pide ao persoal que cumpra coas medidas de protección mentres non se fai efectivo o cese da actividade

A empresa lembra que, ata que se fagan efectivos os peches, o persoal debe cumprir coas medidas de protección para evitar que se espalle o virus. 

Os catro sindicatos de clase con representación na planta de PSA en Vigo (UGT, CCOO, CIG e CUT) reclamaban que se pechasen as instalacións e se parase a actividade e criticaron a postura da empresa de continuar coa produción. Máis de 13.000 persoas firmaron unha petición a través do sitio web change.org reclamando tamén que cesase o traballo nas instalacions.

Despece

  • A CIG denuncia “abusos” empresariais e di que “se están precipitando” os ERTE e as vacacións impostas

    O secretario xeral da CIG, Paulo Carril CC-BY-NC-SA CIG

    A declaración do estado de alarma por parte do Goberno central está provocando “un caos laboral” e “o abuso por parte das empresas sucédese”, afirmou o secretario xeral da CIG, Paulo Carril, nunha rolda de prensa sen presenza física dos medios de comunicación para evitar riscos. Hai, dixo, negativas a conceder permisos para o coidado de maiores e menores e nalgúns casos non se está dotando ao persoal do material necesario para que traballe con seguridade nos centros que manteñen a actividade. Tamén faltan medidas para sectores como os de axuda no fogar, as residencias da terceira idade e a limpeza.

    Estanse propoñendo expedientes de regulación de emprego (ERE) ou expedientes de regulación temporal de emprego (ERTE), e estanse impoñendo vacacións e teletraballo “sen garantir dereitos”, citou. 

    Pide evitar que os custos recaian sobre os traballadores ou sobre as empresas e a creación dun fondo de compensación a tal fin

    O sindicato reclama que “se declare o dereito a un permiso retribuído” para facilitar que as persoas permanezan na casa e que se cree “un fondo extraordinario de compensación” do goberno español para que o custo non recaia nin sobre os traballadores, aos que cre que se lles está a “trasladar o custo”, nin sobre as empresas, ás que pide evitarlles “un dano irreparable” que leve a despidos posteriormente. “Estamos creando as condicións para que despois deste estado de alarma se precipiten máis ERE e recortes de dereitos”, dixo.

    O sindicato non dispón de datos concretos polo momento, pero desde que se anunciou o estado de alarma, “véñense precipitando series de suspensións laborais con ERTE ou imposicións de vacacións, no mellor dos casos”. Aínda que “todos os sectores están afectados a día de hoxe”, o impacto “é máis visible” en hostalaría e turismo, indicou Carril. 

    Desde que se declarou o estado de alarma estanse propoñendo suspensións laborais e vacacións "impostas"

    Cre que “outra cara do abuso” é a de empresas como a de PSA en Vigo, que queren “manter a actividade a toda costa”, o que cualificou de “irresponsabilidade enorme”. Nas cadeas de alimentación, pola súa parte, hai “traballadores sobreexplotados”. 

    Entre as propostas da CIG están tamén que as forzas de orde público vixíen que se dan “as garantías suficientes” para quen está obrigado a traballar e que se clausuren os centros nos que isto non aconteza. O sindicato pide abaratar ou facilitar o pagamento de bens de primeira necesidade como a enerxía, posto que haberá un aumento de consumo nos fogares, e “compensacións especiais” para o persoal que segue traballando durante o estado de alarma.

  • Beatriz Muñoz Tejo

    Beatriz Muñoz Tejo

    Xornalista. De Santiago de Compostela. Estou de volta dunha viaxe chinesa durante a que traballei para Xinhua. Antes diso aprendín en AGN, EFE e Europa Press.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza