Permite roupa ou calzado deportivo para Educación Física, mochilas ou libros de lectura establecidos polo centro pero non uniformes nin "material de carácter recreativo"
A dez días de que comece a campaña da declaración da renda correspondente ao exercicio 2025 a Xunta publicou este venres no Diario Oficial de Galicia unha orde que acouta o material escolar e deportivo mercado entre xullo e decembro do pasado ano que pode ser deducido xunto cos libros de texto.
O Goberno galego aprobou a dedución a finais do pasado ano de xeito retroactivo prohibindo os pagamentos en efectivo pero sen comunicalo correctamente á cidadanía, e despois viuse obrigado a lexislar de urxencia para aceptalos de forma excepcional para as compras xa realizadas durante o pasado ano. E agora publica o detalle dos materiais que poden ou non se incluídos na dedución a pouco máis dunha semana do comezo das declaracións da renda.
Tras prohibir inicialmente os pagamentos en efectivo de xeito retroactivo, a Xunta tivo que lexislar de urxencia para permitilos excepcionalmente para as compras xa realizadas o pasado ano
A medida aprobada polo Goberno galego permite deducirse na declaración da renda de 2025 a realizar nos próximos días o 15% do gasto realizado entre o 1 de xullo e o 31 de decembro do pasado ano en libros de texto, material escolar e material escolar deportivo. A dedución, para familias cunha renda per cápita dun máximo de 30.000 euros, ten un límite global de 105 euros por neno ou nena matriculado en centros educativos públicos ou concertados. E agora se fixan límites para o gasto total dun máximo de 300 en material escolar e de 150 euros en material escolar deportivo, isto é, poden deducirse ata 45 euros en material escolar e ata 22,50 euros en material deportivo, sempre dentro do máximo de 105 euros incluídos tamén os libros de texto.
Tanto os libros como o material a deducir teñen que aparecer detallados en facturas emitidas entre o 1 de xullo e o 31 de decembro, aínda que non fosen pagadas en efectivo e non con medios electrónicos, como esixía a Xunta nun primeiro momento.
A orde agora publicada detalla que entende por material escolar "o conxunto de bens funxibles, instrumentos e recursos didácticos necesarios para o seguimento das ensinanzas nos niveis de educación primaria, secundaria obrigatoria e educación especial impartidos en centros docentes sostidos con fondos públicos". E detalla ese material permitido:
- Cadernos de actividades.
- Cadernos, blocs, carpetas, arquivadores e papel de uso escolar.
- Instrumentos de escritura: bolígrafos, lapis, rotuladores, gomas, afía lapis, regras, compases, escuadras e cartabóns.
- Material de debuxo e manualidades: pinturas, pinceis, plastilina, tesoiras escolares, cola.
- Mochilas e estoxos.
- Libros de lectura establecidos polo centro educativo.
- Dicionarios.
- Calculadoras básicas exixidas polo currículo.
- Material escolar deportivo: roupa e calzado deportivo para a materia de educación física.
Pola contra, como material non permitido figuran:
- Dispositivos electrónicos de uso xeral (ordenadores, tabletas, teléfonos móbiles).
- Uniformes, agás os referidos á roupa deportiva para a materia de educación física.
- Servizos complementarios (comedor, transporte escolar, actividades extraescolares).
- Material de carácter recreativo non vinculado ao currículo.
