A Xunta modifica o convenio e suprime o dereito a comedor do persoal laboral

Imaxe de arquivo dunha mobilización da CIG Función Pública © CIG

Lara Graña / David Lombao

O gasto homoxeneizado no apartado de persoal da Xunta de Galicia foi, a peche de 2011, de 3.627 millóns de euros. As contas públicas de 2012, aínda pendentes dunha modificación que se dá por feita, xa recollen un recorte de máis de vinte millóns de euros. Non ocorre o mesmo cos pasivos financeiros, adicados ao pagamento dos xuros da débeda, cunha contía que aumentará máis dun 31%. Non obstante, a reestruturación do gasto vaise aplicar ao gasto corrente e, nomeadamente, ao que afecta á remuneración dos empregados públicos. As novas medidas postas sobre a mesa, e que a Xunta quere negociar en sete días, pretenden recortar outros 80 millóns de euros en gasto de persoal.

Entre o abano de medidas está a modificación, formulada sen negociación previa, do V Convenio único da Xunta de Galicia. Pacto ao que se chegou durante a etapa do bipartito e publicado no Diario Oficial de Galicia (DOG) do 3 de novembro de 2008. O convenio, daquela, foi negociado e asinado polos representantes da UGT, a CIG e o Goberno autonómico. O anteproxecto recentemente presentado suspende a aplicación de ata tres artigos do documento de 2008. Os que afectan aos empregados públicos non inclúen o matiz da "temporalidade" que si se inclúe no caso da supresión do plus de altos cargos.

Un dos cambios é a suspensión do artigo 29 do V Convenio, e supón a eliminación do dereito a comedor gratuíto para o persoal laboral da Administración. Só se mantén o dereito aos traballadores da quenda de noite a recibir bebidas frías e quentes. A posibilidade de comer ou cear nas cafetarías xestionadas polo Goberno suprímese. O convenio, asinado pola entón directora xeral de Relacións Laborais, Pilar Cancela, explicitaba o seguinte: "Naqueles centros que conten con servizo de comedor garántese o dereito a utilizalo; será gratuíto a partir do 1 de febreiro de 2009 para o persoal que preste servizos no centro sempre que se atope en xornada de traballo ao remate da súa quenda do seguinte xeito: o persoal en quenda de maña terá dereito ao xan- tar, o de quenda de tarde á cea".

Xubilacións forzosas sen reposición que contradín o PP

Outro dos cambios normativos que terán maior impacto no cadro de persoal público é a xubilación forzosa dos traballadores públicos. O paquete de medidas presentado por Facenda aos sindicatos determina que "o persoal que cumbra a idade de xubilación forzosa -65 anos-" disporá "dun prazo dun mes" para "solicitar a prolongación da súa permanencia na situación de servizo activo". En caso contrario, xubilarase automaticamente. Esta solicitude terana que presentar tamén os traballadores que, cando entre en vigor a nova norma, xa teñan 65 anos "e permanezan en situación de activo". Sobre o seu caso, a Xunta tamén resolverá de novo.

Segundo os sindicatos esta medida deixa a porta aberta a xubilación sistemática de todos o persoal ao servizo da Administración que cumpra os 65 anos como unha vía para reducir o plantel. Isto sucede, en boa medida, porque a proposta presentada por Facenda non inclúe o precepto que si incluía o convenio aprobado durante o mandato do bipartito, segundo o cal a Xunta tiña a obriga de substituír aos xubilados anticipadamente "por calquera traballador/a que se atope inscrito como desempregado (...) mediante un contrato da mesma natureza có extinguido).

Se finalmente o recorte proposto pola Xunta se pon en marcha sen modificacións  nun dos ámbitos nos que máis se percibirá, o sanitario, o Goberno galego estará contradicindo ao partido que o sustenta, o PPdeG. Non en van, os conservadores galegos, a través do deputado Miguel Santalices, presentaban o pasado novembro no Parlamento unha proposición non de lei para a elaboración dun "plan de ordenación dos recursos humanos para garantir a continuidade asistencial" no Sergas que atinxe directamente á xubilación.

Nomeadamente, esta proposta, aprobada por unanimidade de populares, socialistas e nacionalistas, instaba a Xunta a ofertar "aos profesionais" do Sergas "a posibilidade de ampliar a idade de xubilación, sempre que se manteña a capacidade funcional do profesional e non sexan posibles novas contratacións ou incorporacións".

Descanso

Segundo a información facilitada pola CIG Autonómica, e presentada por Facenda, tamén se suprime unha das disposicións adicionais do convenio de 2008, que afecta directamente ao persoal laboral da Xunta. En concreto, os traballadores públicos dos centros "que, como causa das súas características específicas", gozasen de descanso en Nadal e Semana Santa, non o poderán seguir facendo. Por último está a modificación do artigo 19 do convenio. Esta implica "a non compensación en libranzas dos domingos e festivos traballados, que se aboarán".

 

Elena Muñoz, titular de facenda © Xunta

Despece

  • "Un ERE encuberto na sanidade pública"

    Os paquete de recortes para o persoal público fixo prender todas as alarmas nun dos sectores máis sensibles, o sanitario. Unha das medidas que, en opinións dos profesionais do Servizo Galego de Saúde, máis pode afectar á calidade da asistencia é a "xubilación forzosa" dos funcionarios aos 65 anos e reposición de tan só o 10% destas baixas. Trasladado ao plantel de médicos, esta operación supón, segundo cálculos da Asociación Galega para a Defensa da Sanidade Pública, que nos vindeiros catro anos "se van xubilar 1.900 médicos e só se reporían 200". Resultado: 1.700 médicos menos no Sergas, o que para o voceiro da asociación, Manuel Martín, deixa o servizo "nunha situación límite" tras a posta en marcha dun "verdadeiro expediente de regulación de emprego encuberto".

    Neste contexto, Martín sinala que o propio Goberno galego e a forza política que os sustenta, o PPdeG, vén recoñecendo "a necesidade de máis médicos" con declaracións públicas e decisións concretas. Así, lembra, a ex conselleira de Sanidade, Pilar Farjas, veu con bos ollos a proposta parlamentaria na que se aprobou a "prolongación voluntaria da idade de xubilación para aqueles facultativos que tivesen interese en seguir traballando". Ademais, na súa opinión, carece de sentido que "se prolongue ata os 67 anos a idade de xubilación do resto de traballadores, incluíndo mineiros ou traballadores da construción", pero non se faga o propio "cos médicos que, por exemplo, só pasan consulta":

    Este "ERE encuberto", tanto no plantel médico como no de enfermaría, non é para este colectivo o único motivo de alarma. O feito de que "os novos interinos" vaian traballar "con horario reducido" vai provocar "enfrontamento dentro dos cadros de traballadores" ou "problemas para cubrir gardas". Os prexudicados, alerta, serán "os pacientes":

    Tamén desde a área sanitaria da Confederación Intersindical Galega se censurou nos últimos días a intención do Goberno galego. "Estas medidas son inasumibles na súa totalidade", afirman dende a CIG Saúde, xa que "a precarización das condicións laborais dos empregados e empregadas do Sergas" deriva en "máis precarización da asistencia sanitaria". "Reducir persoal e aumentar carga de traballo diminúe a calidade da asistencia", explicitan, ao tempo que xa avanzan mobilizacións entre os profesionais.

     

    Traballadora dun hospital público galego © Sergas

  • Recorte de 46 persoas ao día na administración

    Durante os últimos tres meses de 2011, o número de asalariados no sector público galego con contrato temporal reduciuse en 4.200 persoas. Un balance de case medio cento de traballadores cada día. Coa supresión da taxa de reposición, a non convocatoria de oposicións e a redución de xornada, os interinos e outros empregados con contrato de duración definida van seguir padecendo o efecto dos recortes. 

  • Feijóo distingue entre "esforzo" dos funcionarios e "discriminación" aos altos cargos

    Unha das propostas máis mediáticas dentro do paquete de medidas da Xunta para reducir gasto de persoal está a "suspensión temporal" do plus de altos cargos, o complemento para os funcionarios que ocuparon postos directivos no Goberno galego, aprobado por unanimidade no Parlamento en 2007 e que está vixente na práctica totalidade das comunidades autónomas. Mentres que dende os sindicatos da función pública se reclama a eliminación definitiva deste plus dende o momento da a súa aprobación hai cinco anos, a Xunta esfórzase en aclarar que, ao contrario doutros recortes, este complemento volverá "cando poidamos falar de recuperación económica".

    O propio presidente do Executivo galego, Alberto Núñez Feijóo, consideraba a pasada semana que a fin do plus de altos cargos supón unha "discriminación" para os funcionarios da Xunta a respecto de, por exemplo, funcionarios do Estado que cheguen a Galicia para ocupar un posto directivo na Administración autonómica, dado que estes si que seguirán cobrando o plus cando regresen á súa praza de orixe. Así as cousas, o titular do Goberno galego especifica que o plus "non se pode percibir" unicamente "durante a crise".

    Neste contexto, Feijóo aseguraba ademais o pasado xoves, ao remate do Consello da Xunta, que a súa intención é "non tocar as retribucións dos empregados públicos", se ben cinguía esta limitación ao salario, o que implicitamente deixa a porta aberta a meter a tesoira nos complementos, que en moitos casos supoñen unha parte substancial da propia retribución. "Síntome orgulloso dos empregados públicos", engadía Feijóo quen, "como presidente", asegura que esa fachenda se estende tamén á posibilidade de "pedirlles un sacrificio, porque estou convencido de que a maioría o entenden", dado que "teñen garantida a súa nómina".

    Do mesmo xeito, o líder conseravdor descarta que o paquete de recortes aos empregados públicos vaia xerar rexeitamento social ou protestas. "A sociedade está a relacionar cunha enorme madurez", afirma, nun contexto no que "temos que contraer o gasto para liberar o escaso crédito", no camiño de que España sexa "a Alemaña da Europa do sur". En calquera caso, "neste momento non temos outra opción", conclúe.

    Feijóo, ao remate do Consello do 2 de febreiro © Xunta

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza