CC.OO. e UGT levaron a cabo o seu acto central deste 1º de maio en Galicia na cidade de Vigo, cunha manifestación que reuniu milleiros de persoas e que estivo encabezada por unha faixa na que se podía ler "Subir salarios. Repartir beneficios. Baixar prezos", a mensaxe máis repetida polos líderes das dúas centrais sindicais, puxeron o foco na necesidade de que a patronal asuma a necesidade de incrementar máis os salarios para compensar o encarecemento dos prezos que se vén producindo no último ano e medio.
José Antonio Gómez (UGT) e Amelia Pérez (CCOO) lembraron que no medio da actual crise de prezos as grandes empresas están a rexistrar cifras récord de beneficios e instáronas a avanzar cara a un "reparto xusto da riqueza"
En Vigo José Antonio Gómez (UGT) e Amelia Pérez (CCOO) lembraron que no medio da actual crise de prezos as grandes empresas están a rexistrar cifras récord de beneficios e instáronas a avanzar cara a un "reparto xusto da riqueza". En caso contrario, advertiron, os vindeiros meses estarán marcardos pola conflitividade laboral na procura duns incrementos salariais cos que traballadores e traballadoras non perdan poder adquisitivo. Os últimos datos do INE sobre custos laborais, do derradeiro trimestre de 2022, indican un incremento dos soldos nun ano do 2,7% en Galicia, fronte ao 4,7% no Estado. Naquela altura, a variación interanual do IPC situábase en Galicia no 6,4%.
CCOO e UGT marcharon xuntos en todas as cidades, agás en Pontevedra e Lugo, onde se manifestaron por separado, e Viveiro, onde só convocou CCOO. A unidade si estivo presente na Coruña, a segunda marcha máis numerosas despois da de Vigo, Ferrol, Compostela, Ourense e Vilagarcia.
CCOO e UGT marcharon xuntos en todas as cidades, agás en Pontevedra e Lugo, onde se manifestaron por separado
CCOO denuncia que "en boa parte, a suba dos prezos vén determinada polo exceso de beneficios empresariais", pois "as empresas repercuten o custo das subas dos produtos enerxéticos no prezo final dos bens e servizos para manteren as súas marxes de beneficios". "Así, provocan que os efectos desta crise estean recaendo sobre as maiorías sociais, as traballadoras e os traballadores, e con efectos moi graves nos segmentos máis vulnerables da poboación", critica o sindicato.
CCOO denuncia que "en boa parte, a suba dos prezos vén determinada polo exceso de beneficios empresariais"
O sindicato destaca que a campaña 'Salario ou conflito' lanzada durante o 2022 "deu bos resultados e debe seguir adiante", subliñando que "naqueles sectores onde hai organización sindical, cultura negociadora, vínculo da clase traballadora ao convenio, e nos que se fomenta a participación directa das traballadoras e os traballadores nos procesos de negociación e, chegado o caso, de mobilización, os convenios colectivos foron mellores". "Temos un reto por diante e imos por el. Se a clase empresarial non senta nas mesas de negociación con propostas realistas, que recuperen o poder de compra dos salarios, recruará o conflito e serán os únicos responsables", sinala a central.
O secretario xeral de UGT-Galicia fixo un chamamento á CEOE para que "sente e comece a falar e a tratar de pechar un acordo para a mellora dos salarios". Se non é así, anunciou, "haberá conflito"
De igual xeito, o secretario xeral de UGT-Galicia fixo un chamamento á CEOE para que "sente e comece a falar e a tratar de pechar un acordo para a mellora dos salarios". Se non é así, anunciou, "haberá conflito". "A día de hoxe xa se están a desenvolver mobilizacións en determinados sectores, precisamente, para demandar melloras salariais que lles permitan afrontar unha economía marcada pola alta inflación e os elevados tipos de xuro", lembra o sindicato.
UGT e CCOO tamén puxeron sobre a mesa "a dignificación das indemnizacións por despedimento". "Temos que avanzar cara a un custo do despedimento suficientemente disuasorio, xusto e adecuado ás circunstancias sociais, vitais e de reempregabilidade", sinalaron
UGT tamén puxo sobre a mesa "a dignificación das indemnizacións por despedimento". "A firma por parte de España en 2021 da Carta Scoial Europea, que é de obrigado cumprimento, obriga a protexer o emprego. E no noso país é aínda barato despedir e demasiado fácil. Temos que avanzar cara un custo do despedimento suficientemente disuasorio", sinalou o seu secretario xeral en Galicia.
"Temos que avanzar cara a un custo do despedimento suficientemente disuasorio, xusto e adecuado ás circunstancias sociais, vitais e de reempregabilidade das persoas vítimas de decisións inxustas", engadiu pola súa banda CCOO, que concorda no mesmo obxectivo
Nas marchas, os dous sindicatos tamén puxeron de relevo "as conquistas sociais e laborais que conseguimos mediante o diálogo social e que supoñen gañar dereitos e mellorar a vida das persoas traballadoras"
Nas marchas, os dous sindicatos tamén puxeron de relevo "as conquistas sociais e laborais que conseguimos mediante o diálogo social e que supoñen gañar dereitos e mellorar a vida das persoas traballadoras". Neste senso, CCOO subliña "dúas grandes reformas" aprobadas na actual lexislatura: a reforma laboral e a reforma da Seguridade Social, así coma "as medidas sociais e económicas tomadas para afrontar as crises vividas". Así mesmo, lembran que ante o novo ciclo electoral que está a piques de comezar, "non é o mesmo quen goberne" e alertan de que "o risco reaccionario está na sociedade española máis presente ca nunca desde a transición á democracia".
De igual xeito, UGT destacou tamén as medidas adoptadas nos últimos anos polo goberno de PSOE e Unidas Podemos "que melloraron as condicións sociais e laborais dun amplo sector da poboación nesta país", salientando por exemplo "as progresivas subas do SMI, con preto de 100.000 persoas beneficiadas na nosa Comunidade, hoxe nos 1.080 euros"
