O xulgado do social número 3 de Ourense considera que a franquía da cadea de comida rápida McDonald's na cidade vulnerou os dereitos fundamentais dunha das súas traballadoras. Fíxoo, segundo considera unha sentenza ditada o pasado 1 de setembro e á que tivo acceso Praza.gal, por modificar "substancialmente" as súas condicións de traballo mentres se atopaba de baixa por un embarazo de risco.
O xulgado condena a empresa a anular a mudanza na xornada laboral da traballadora, que tiña recoñecido o seu horario por sentenza de conciliación, e a indemnizala con algo máis de 6.000 euros
A traballadora, que "vén prestando servizos" para a empresa dende hai máis dunha década, recibiu unha comunicación o pasado xullo na que lle era comunicada o que, indica a sentenza, "aplicando a normativa" e a xurisprudencia "se debe considerar unha modificación substancial de condicións de traballo". Concretamente, no relativo á súa xornada laboral.
Nesa comunicación, detalla o ditame, a empresa "informa" a traballadora do "horario que vai ter cando se incorpore, pasando de entrar ás 9 a entrar ás 12", todo isto "sen prexuízo de que poida variar con posterioridade, pois por agora é o horario que estaría vixente". Esta circunstancia traería consigo "un sacrificio á traballadora" que ademais, resalta a propia sentenza, "ten recoñecido o horario" que a empresa pretende cambiar "por sentenza de conciliación da vida familiar".
A propia sentenza salienta, xunto ao feito de que a muller "está de baixa por risco no embarazo" dende o pasado 1 de xuño, que a traballadora "é afiliada ao sindicato CIG" e foi a propia Confederación Intersindical Galega a que a representou neste proceso, que vén de concluír cunha condena á compañía. Concretamente, a sentenza -recorrible ante o Tribunal Superior de Xustiza- ordena a anulación do cambio da xornada laboral da traballadora e, ademais, a indemnizala con 6.251 euros "en concepto de danos morais e prexuízos".
A CIG "celebra" a sentenza e subliña que "non estamos a falar dun caso illado nesta empresa"
A Secretaría das Mulleres da CIG "celebra" a sentenza e tamén que "vaia acompañada dunha sanción económica, pois deste xeito moitas empresas farán algo máis de caso" e "pensarán antes de poñer impedimentos inxustificados" a dereitos como o da conciliación, resaltan. Así e todo, o sindicato advirte que neste caso concreto "non estamos a falar dun caso illado nesta empresa", na que a situación "constante" é dun "cúmulo de ameazas, coaccións, presións e mesmo actitudes de agresividade física, de maneira moi especial con mulleres".
Neste sentido, a CIG lembra que xa "houbo outras demandas perante o Xulgado do Social" e denuncias na Fiscalía "por parte de varias traballadoras", caso dunha condena en 2018 por ameazas e lesións no marco das eleccións sindicais. "Actualmente -resaltan- temos pendente o xuízo dunha nova demanda, tanto pola vía penal como polo xulgado do social, doutra das traballadoras desta mesma empresa".
Por todo isto, o sindicato "apela, unha vez máis" á "matriz de McDonald's España en Madrid" para "reclamarlle medidas cautelares contra o seu franquiciado" en Ourense, que conta cun local no Centro Comercial Pontevella -ao que se refiren os feitos agora abordados no xulgado- e con outro en Fonsillón. "Pedimos a retirada da titularidade de dita franquía para alguén tan insorportablemente déspota, machista e antidemócrata", din en referencia ao xerente da empresa de restauración en Ourense.