O mes de marzo en Galicia supuxo unha importante creación de emprego malia que a redución do paro non foi tan grande. O mercado laboral sumou case 7.500 persoas máis afiliadas á Seguridade Social, ata sumar 1.079.396 traballadores e traballadoras, a mellor cifra neste mes desde 2008, antes da gran crise que elevou o desemprego e a destrución do emprego aos maiores niveis en décadas.
Galicia suma case 7.500 persoas máis afiliadas á Seguridade Social en marzo, alcanzando as cifras do mesmo mes en 2008, previo á crise
Precisamente, a afiliación media de traballadores neste pasado marzo coincide case exactamente coa do mesmo mes daquel 2008 (1.079.396 persoas de agora fronte a 1.079.466 daquela). Galicia alcanza así un nivel de emprego neste mesmo período semellante ao que tiña antes da grave recesión, aínda lonxe do teito alcanzado o pasado verán pero por riba do de hai dous anos. Co detalle a ter en conta, ademais, de que hai 17 anos a Semana Santa cadrara en marzo, o que axudara ao incremento de afiliados.
O paro descendeu en marzo en 1.822 persoas e Galicia ten 10.000 persoas paradas menos que hai un ano
Non foi así nesta ocasión, na que o período vacacional chegará en abril, o que tamén explica un tímido descenso do paro, de tan só 1.822 persoas. Con todo, o número de desempregadas apuntadas nas oficinas de colocación case 10.000 menos (-9.856) que hai un ano, un descenso do 7,6%, superior á media estatal.
O paro descendeu en marzo en todas as provincias galegas e en todos os sectores agás no colectivo sen emprego anterior. No entanto, como adoita, a baixada no número de desempregados é moito maior nos servizos, con 1.342 persoas paradas menos que o mes anterior.
Ademais, en Galicia asináronse no pasado mes de marzo un total de 52.068 contratos, 6.741 máis que en febreiro e 2.130 máis que no mesmo mes do pasado ano. De todas as contratacións levadas a cabo, tan só un terzo foron indefinidas, polo que dous de cada tres seguiron sendo temporais, unha proporción mellor que antes da aprobación da última reforma laboral pero aínda elevada e claro síntoma do que supón a chegada dunha época vacacional como a Semana Santa.
Porque marzo adoita ser un bo mes para o emprego, cunha importante creación de postos de traballo, moitos deles relacionados coa hostalería e o turismo, no que inflúe tamén a chegada do bo tempo, que en Galicia foi habitual nestas últimas semanas, o que impulsou a contratación, que se prevé que leve aínda un impulso importante coa chegada dos días festivos.
Do total de contratos asinados en marzo, un terzo foron indefinidos en Galicia
En canto ao número total de persoas paradas en Galicia, segundo os datos feitos públicos polo Ministerio de Traballo, un 42% é muller e un 4,2% é menor de 25 anos. Ademais, e como tamén adoita ser habitual, case un 72% pertence ao sector servizos.
No que ten que ver con outros datos, no país hai un total de 79.132 persoas que reciben algún tipo de prestación por desemprego, das que 43.151 son contributivas. De media, estas últimas cobran 971,1 euros, algo menos que os 1.014,5 da media estatal.
Precisamente, no Estado, o paro rexistrado nas oficinas dos servizos públicos de emprego baixou en 13.311 persoas en marzo en relación co mes anterior, debido tamén sobre todo ao sector servizos. En total, o número de desempregados é de 2.580.138 persoas, a menor cifra no terceiro mes do ano desde 2008, segundo destaca o Ministerio, un dato idéntico ao de Galicia.
Debullando as cifras da Seguridade Social, ademais, revélase que España alcanzou un máximo histórico en marzo de 10,1millóns de mulleres traballando.
