Os malos resultados electorais do PSOE en Euskadi e sobre todo en Galicia e a súa influencia na estatexia do partido en toda España destacan nas portadas de prensa impresa esta mañá: "El PSOE promete una "renovación ideológica" tras su desplome" (El Pais), "La devacle electoral reabre la inestabilidad en el PSOE" (La Vanguardia) ou "La devacle del PSOE fuerza un giro social en el PSC" (El Periódico)
CiU sobe até 67 escanos e quedaria a un só escano da maioria absoluta segundo unha sondaxe de RAC1. O PSC baixaria até 21, o PP manteriase en 17, ERC sobre até 14, ICV a 12 e Ciutadans a 4.
Obama imponse a Romney no derradeiro debate electoral, que se celebrou esta madrugada en Florida e que se centrou na politica exterior. As sondaxes de CNN e CBS outorgan unha clara vitoria ao candidato demócrata.
Francisco Caamaño afirma sobre Rubalcaba que "non necesitamos un paracaidas para ralentizar o desplome, necesitamos unhas ás" e engade que "hai que comezar a falar moi seriamente da renovación orgánica e ideolóxica. Necesitamos un liderado capaz de crear esas ás e necesitámolo con urxencia".
Carlos Neira explica no seu blog que o crecemento de AGE "está sustentado tanto en antigos votantes do BNG como do PSOE" e tamén en "xente que se resistiu a subirse ao carro da abstención, como fixo unha parte importante da poboación".
A patronal galega celebra a vitoria do PP nas eleccións. A Confederación de Empresarios de Galicia emite un comunicado no que asegura que a maioría absoluta "achega a estabilidade necesaria para abordar os esixentes retos aos que ten que facer fronte a comunidade".
Ismael Rego pide a dimisión de Pachi Vázquez. Rego afirma que "non é o momento de reflexións, é o momento das dimisións" e engade que "non houbo ninguén que lle fixese tanto dano ao partido en tan pouco tempo".
José Bono censura que o PSOE "goberne con independentistas en Galicia" e asegura que lle "ruboriza" que o partido empregue a palabra 'español' nas súas siglas.
Guillerme Vázquez confirma que Francisco Jorquera será o voceiro do BNG no Parlamento. E ante os resultados obtidos este domingo, que cualifica de "moi malos", di que "o BNG ten a súa liña propia que vai seguir defendendo" ainda que cumpra "un periodo de reflexión". Preguntado por un posible entendemento con Beiras, o voceiro nacional do Bloque afirma que "os camiños do señor son inescrutábeis".
A publicidade en internet en España xa supera á dos medios impresos, que cae un 20% no primeiro semestre do ano.
