🏳️🌈
Félix Mondelo, novo presidente do Consello da Avogacía Galega. O letrado lucense era ata agora secretario da institución. Nesta entrevista do ano 2014 Mondelo debullaba en Praza.gal as dificultades xeradas polas reformas impulsadas dende o Ministerio de Xustiza, na altura dirixido por Alberto Ruiz-Gallardón.
Membros do equipo do estadounidense Bernie Sanders desprázanse a Londres para apoiar o laborista Jeremy Corbyn na recta final da campaña británica
Telmo Martín volve tomar posesión como alcalde de Sanxenxo entre eloxios ao ex-rexedor que lle entregou o poder por "valente". Cóntao Pontevedra Viva
A perda pública de apoios do fiscal anticorrupción apunta a unha saída inminente de José Manuel Moix tras a saída á luz da súa participación nunha sociedade radicada en Panamá.
O alcalde de Santiago reprocha que non foi informado do desaloxo do centro ocupado Escarnio e Maldizer por parte da Policía e censura os episodios violentos ao remate da posterior manifestación. O PP local acusa a Martiño Noriega de "incitar ao incumprimento das resolucións xudiciais" a respecto deste edificio, ocupado dende a primavera de 2014, cando os conservadores ostentaban o goberno da cidade.
O pleno do Congreso aproba os primeiros Orzamentos de Rajoy en minoría cos votos do PP, Ciudadanos, PNV, Coalición Canaria e Nueva Canarias. As contas, que agora seguen trámite no Senado, inclúen un 32% de caída do investimento en Galicia por mor da fin das grandes partidas do AVE a Madrid, cuxo calendario foi modificado nos últimos días en virtude dun pacto do PP con Foro Asturias.
A lista de espera das escolas infantís da Xunta queda finalmente cuns 6.000 nenos e nenas. Europa Press recompila na súa web os datos das resolucións publicadas polo Consorcio de Benestar e mais pola Axencia de Servizos Sociais. Feijóo asegurou que estas escolas "non" teñen lista de agarda e mantivo tamén que o Bono Concilia, a subvención para quen quedan sen praza, pode chegar a "todas" as familias, pero mantén as limitacións.
O presidente da Deputación de Lugo subliña que a votación sobre a presidencia da Sociedade Urbanística Provincial "non ten maior importancia" porque os grupos xa acordaran "promover cambios no consello de administración" da entidade. Darío Campos lamenta que o PP queira "meter cizaña e desprestixiarme" e resalta que o organismo estará dirixido por Manuel Martínez ou por el mesmo.
Os deputados galegos do PSOE no Congreso trasladan ás vítimas de Angrois que "poden contar co seu apoio" á apertura dunha comisión de investigación sobre o accidente. Tras manter unha xuntanza coa Plataforma Víctimas Alvia 04155 a coordinadora dos representantes do PSdeG, Pilar Cancela, asegurou que vai "trasladar esta posición favorable" ao resto do Grupo Socialista, na liña da votación da pasada semana no Parlamento galego. Se o resto de grupos manteñen as súas posturas, esta mudanza permitiría sacar a comisión adiante.
Arquivada a denuncia da CIG contra a cúpula de Caixa Galicia. A Audiencia Nacional, en base ao informe da Fiscalía, decide arquivar a demanda da central, que denuncia que "mentres as cúpulas de Bankia ou da CAM están sendo xulgadas", a da entidade galega "non foi sequera investigada".