Pontevedra Viva leva á súa portada a situación dunha muller viguesa que vén de ser condenada a prisión por agredir hai dez anos o seu ex-mozo, condenado por violencia de xénero. Compañeiros de traballo, veciños e amigos reclámanlle ao Goberno que lle conceda un indulto.
A falta de substituto do xuíz de violencia de xénero na Coruña obriga a suspender oito xuízos. As vistas estaban fixadas para comezos de setembro, pero foron adiadas a outubro.
O Banco Santander vende a Blackstone o 51% dos activos de ladrillo do Banco Popular. A operación, valorada en 30.000 millóns, é a maior deste tipo da historia de España.
A seca afunde as renovables en Galicia e dispara un 60% a electricidade con carbón. A produción dos encoros derrúbase case un 70% e un 20% a dos parques eólicos.
La Marea afonda nesta reportaxe na historia do campo de concentración franquista de Camposancos (A Guarda), que chegou a recluír ata 5000 persoas
O BNG de Castro de Rei denuncia a inserción na revista-programa das festas de Castro Ribeiras do Lea 2017 dun anuncio que inclúe un escudo franquista. A revista, ademais do programa festivo, leva ao inicio un saúdo do alcalde da localidade, xa que o Concello colabora con 6.000 euros, entroutras axudas.
O único concelleiro do PSdeG en Coristanco presenta unha moción de censura contra o goberno de TeGA. O PP apoiaría que o edil socialista se convertese no alcalde ante a "sorpresa" da dirección provincial.
O novo plan de transporte comeza con "innumerables problemas" segundo as tres federacións que agrupan o 90% do sector. Os sindicatos critican incumprimentos de contratos e subrogación de persoal e instan a convocar a comisión se seguimento.
O xuíz instrutor de Granada vén de emitir unha orde de detención contra Juana Rivas, a muller que permanece en paradeiro descoñecido xunto aos seus fillos dende o 26 de xullo, tentando evitar que os nenos sexan entregados ao pai, condenado por maltrato. Juana Rivas non se presentou este martes no xulgado, onde estaba citada
Ana Peleteiro, sétima no Mundial de Atletismo de Londres tras a final de triplo salto. A atlega galega acada unha marca de 14,23, novo récord galego e de España sub-23.
