Os concellos galegos ultiman as cabalgatas de reis deste xoves. Hoxe presentouse a de Vigo, desta volta inspirada no "mundo xurásico" e composta por 14 carrozas, e en Valença do Minho avanzáronse detalles da cabalgata da eurocidade, que percorrerá as principais rúas da vila portuguesa e mais de Tui.
O ex-alcalde do Grove Alfredo Bea denuncia o xornalista Nacho Carretero polo seu libro 'Fariña', sobre o narcotráfico galego. A axencia Europa Press detalla na súa web que o antigo rexedor esixe unha rectificación e indemnización pola mención á súa condena que finalmente acabou en absolución. Bea Gondar foi alcalde entre 1983 e 1991.
O Sergas lanza unha aplicación móbil para que os pacientes poidan "orientarse" dentro dos hospitais de Vigo e Lugo, nos que se rexistraron múltiples queixas pola dificultade para atopar os diferentes servizos. A app chámase SIGUE e a Xunta ofrece a súa descarga en castelán na Play Store de Google e mais na App Store de Apple.
Aumenta o malestar no Goberno de Portugal pola decisión española de construír un almacén nuclear a apenas 100 quilómetros da fronteira, en Almaraz (Cáceres). O ministro portugués do Ambiente non acudirá á xuntanza prevista co gabinete de Rajoy para o día 12 se esa construción é confirmada, advirte. Recólleo Público
Acusan La Voz de Galicia de publicar unha nova falsa, a partir dunha fotografía dun lobo devorando un cabalo supostamente tirada por un gandeiro de Abadín. A imaxe pode verse en publicacións do ano 2010 e foi tomada en Asturias. A noticia xa foi retirada da edición dixital do xornal
A Xustiza declara “ilegal” o apoio do Concello de Santiago ao boicot a Israel, campaña que fora promovida polo BDS (Boicot, Desinvestimentos e Sancións). Así o informa a AGAI.
Un maxistrado do Supremo pon en dúbida que o machismo estea detrás da violencia de xénero. Antonio Salas cre que é un problema de "maldade das persoas".
Un home destroza a casa da súa ex-parella en Pontevedra e tenta agredila. Foi detido tras unha alerta dos veciños do edificio. Cóntao Pontevedra Viva
VÍDEO | A FGF resume o máis destacado do Galicia-Catalunya de fútbol do pasado día 22. O encontro supuxo o retorno da selección feminina tras oitos de ausencia
A provincia de Ourense non rexistra ningún nacemento no primeiro día do ano por primeira vez en dúas décadas. Cóntao Faro de Vigo