Uns 500 detidos nas protestas en Fráncfort contra o BCE. As manifestacións contra o Banco Central durante a inauguración da súa nova sede acaban con importantes disturbios.
Fálase
-
17 turistas mortos nun atentado en Tunisia. Un comando terrorista asaltou o Parlamento e tomou reféns nun museo.
A RAG nomea Académico de Honra a Basilio Losada. Nado en Láncara e emigrante en Cataluña, a Academia defineo como "unha das figuras senlleiras da literatura e a cultura galega do noso tempo, personalidade plural que se manifesta en moi diversas facetas".
Cidadanía de Coia concéntrase ante os xulgados polo xuízo a Diego, outro veciño do barrio ao que se acusa de agredir un policía durante as protestas contra o barco na rotonda. A veciñanza acusa os axentes de "mentir" e censuran a "represión". Foto de @Anova_irmandade
Seguen reducíndose os salarios en Galicia. No cuarto trimestre de 2014 o soldo medio caeu un 0,5%, pero o pagamento por hora descendeu aínda máis, un 2,8%. Isto debeuse ao incremento de horas traballadas, moitas delas non remuneradas.
FCC e Bankia están preto de venderlle Globalvía (propietaria da Autoestrada Central Galega, que une Santiago co Alto de Santo Domingo) a un fondo de investimento de Malaisia por 450 millóns de euros.
Carlos Negreira critícalle á xuíza Pilar de Lara que constrúa "novas conxeturas" cos "mesmos feitos" e nega ter coñecemento de "irregularidades", en contra do sostido pola maxistrada, que sinala que o alcalde da Coruña era consciente dos enchufes realizados polo seu tenente de alcalde, Julio Flores.
Susan George presentou este martes en Madrid o seu novo libro, Los usurpadores: cómo las empresas transnacionales toman el poder. A activista, que o vindeiro 23 de marzo ofrecerá unha conferencia en Vigo, chama a loitar contra o TTIP: "Non hai que cambiar o tratado con EEUU, hai que librarse del porque é perigosísimo"
Benjamin Netanyahu gaña as eleccións en Israel con 29 deputados fronte á coalición Unión Sionista do laborista Isaac Herzog, con 24. O actual primeiro ministro buscará agora apoios para acadar os 61 escanos que necesita para gobernar, no que será o seu cuarto mandato. A unión de partidos árabes converteuse, con 14 deputados, na terceira forza.
O Tribunal Supremo anula a sentenza da Audiencia Nacional que absolvera 19 dos 20 imputados polas protestas ante o Parlamento de Cataluña de xuño de 2011 e condena oito deles a tres anos de cadea por un delito contra as institucións do Estado