Fracasa a formación do goberno italiano negociado ente o M5S e a Liga Norte despois de que o Presidente da República, Sergio Mattarella, vetase a persoa proposta pola formación de ultradereita como ministro de Economía, Paolo Savona, contrario ao euro. A Liga Norte racha o acordo e pide novas eleccións, nas que as sondaxes lle auguran unha forte suba.
Pablo Iglesias e Irene Montero obteñen un 68% de respaldo na súa consulta ás bases de Podemos sobre a adquisición da súa vivenda. A participación, de 188.176 persoas, o 38,5% do censo de inscritos en Podemos, é unha cifra de récord no censo total de Podemos. Sobre o censo activo, a porcentaxe é do 70%.
A Garda Civil aborda o cantante Evaristo Páramos, ex-vocalista de La Polla Records nacido en Tui e vasco de adopción, por uns comentarios “insultantes” supostamente pronunciados entre as súas cancións nun concerto en Jerez coa súa actual formación, Gatillazo. Cargos de BNG, Podemos ou Esquerda Unida xa amosaron o seu rexeitamento e o seu apoio á liberdade de expresión.
Irlanda despenaliza o aborto tras un referendum cunha participación superior ao 64% no que máis do 66% votou a favor.
O PSOE acepta convocar eleccións “nuns meses” unha vez que Ciudadanos apoie a moción de censura pero os de Rivera piden que a retiren para facer unha conxunta que convoque comicios inmediatos.
Alternativas na Xustiza-CUT denuncia o “abuso de autoridade” dun acompañante de Feijóo que derrubou este venres a unha delegada sindical na Coruña que protestaba no marco da folga do persoal de Xustiza.
A A-8 volve pechar por néboa en Mondoñedo nunha xornada na que Ana Pastor, que a abriu hai catro anos como ministra de Fomento, inaugurou unha rúa na vila como presidenta do Congreso
A xuíza deixa en liberdade, con cargos por homicidio imprudente, o propietario da pirotecnia detido pola explosión de Tui que causou dúas mortes e unha trintena de feridos.
A batalla descoñecida, de Paula Cons, estréase este venres na sala Numax, en Santiago. Hai uns meses falamos coa directora: “Para a poboación en xeral, a venda de volframio aos nazis na posguerra só valeu para prolongar a fame”.
O PSOE rexistra no Congreso a moción de censura contra Rajoy como resposta ás condenas polo caso Gürtel. Consulta aquí toda a información
