A xuntanza entre o ministro Wert e os responsables de Educación das comunidades autónomas finalizou coa decisión de que cada autonomía aplicará distintas subas das taxas. As universidades de Galicia, Extremadura, Andalucía, Euskadi e La Rioja subirán os prezos das matrículas ao redor do 2%, mentres que Catalunya podería incrementalos até un 66%, en función da renda.
Fálase
Veciños do lugar de Painceira, parroquia de Barqueira, no coruñés concello de Cerdido, denuncian que as súas fincas foron sulfatadas hoxe como efecto colateral das fumigacións con canóns en plantíos de eucaliptos lindeiros, segundo informa o SLG.
O Goberno podería liquidar Novagalicia Banco. NCG, Catalunya Caixa ou o Banco de Valencia será unha das tres entidades "encamiñada cara á liquidación", segundo asegura Joaquín Almunia nunha entrevista en Reuters.
A Coruña celebrará este sábado o Bloomsday. Seguindo os ritos habituais do 16 de xuño, os seguidores do Ulises de James Joyce, emularán no Pub Dublín a xornada do seu protagonista (Leopold Bloom), comezando por un almorzo irlandés. Ademais, a partir das 12 do mediodía farase unha lectura colectiva da obra, e todos aqueles que participen estarán convidados a unha caña.
A UE pedirá a España que peche os bancos problemáticos se quere recibir o rescate de até 100.000 millóns. As institucións comunitarias esixirán que quebren aquelas entidades que non desestabilicen a economía.
A vindeira semana comezan os actos do Centenario de Eugenio Granell. Compostela acollerá seis exposicións, das que este mes se inauguran tres: unha na Cidade da Cultura, outra no Museo do Pobo e outra na propia Fundación Granell. Neste dossier pódese consultar toda a programación.
Rodrigo Rato renuncia á indemnización de 1,2 millóns que lle correspondía tras a súa saída de Bankia.
Xavier Queipo gaña con Extramundi o premio San Clemente de novela, no que o xurado son os alumnos e alumnas do Instituto Rosalía de Castro de Compostela. Marina Mayoral fíxose co premio na categoría de castelán con Deseos e o suízo Peter Stamm, na de internacional, pola súa obra Sete anos.
Greenpeace publica un vídeo no que se aprecian as consecuencias do incendio que arrasou parte das Fragas do Eume.