A vindeira semana comezan os actos do Centenario de Eugenio Granell. Compostela acollerá seis exposicións, das que este mes se inauguran tres: unha na Cidade da Cultura, outra no Museo do Pobo e outra na propia Fundación Granell. Neste dossier pódese consultar toda a programación.
Fálase
Rodrigo Rato renuncia á indemnización de 1,2 millóns que lle correspondía tras a súa saída de Bankia.
Xavier Queipo gaña con Extramundi o premio San Clemente de novela, no que o xurado son os alumnos e alumnas do Instituto Rosalía de Castro de Compostela. Marina Mayoral fíxose co premio na categoría de castelán con Deseos e o suízo Peter Stamm, na de internacional, pola súa obra Sete anos.
Greenpeace publica un vídeo no que se aprecian as consecuencias do incendio que arrasou parte das Fragas do Eume.
O PP denuncia a Deputación de Lugo ante a Fiscalía pola campaña da vicepresidencia contra o rescate bancario "por financiar con fondos públicos a campaña dun partido político", en relación ao BNG.
El Confidencial Digital afirma que o Goberno central baralla unha reforma do Código Penal para perseguir o fraude no cobro da prestación por desemprego, que pasaría a ser un delicto.
O pleno do Penal do Tribunal Supremo non ve delicto nos gastos de viaxes de Dívar, por 11 votos contra 4. Segundo El País, cinco vogais progresistas do Consello Xeral ro Poder Xudicial forzan a celebración un pleno extraordinario para mañá ou pasado; neste pleno se debaterá a continuidade de Carlos Dívar como presidente.
Adicae (Asociación de Usuarios de Bancos e Caixas) pide en Santiago que o capital que conforma o rescate bancario se utilice para devolverlles os cartos ás persoas que foron estafadas coas participacións preferentes, e tamén para que flúa o crédito cara ás pequenas empresas e os particulares.
Os traballadores de Alcoa chegaron este mediodía a San Caetano, completando o camiño a pé dende A Coruña. Reuníronse co conselleiro de Industria, Javier Guerra, para solicitarlle que a Xunta actúe como interlocutor das súas demandas ante Madrid.
O ministro británico de Finanzas, George Osborne, afirma no Financial Times que a saída de Grecia do euro pode ser o prezo a pagar para convencer a Alemaña de que debe salvar a moeda única. Ademais, critica a fórmula escollida para o rescate aos bancos españois, pois tería preferido unha "inxección directa", sen pasar por un goberno español do que dubida da súa credibilidade.