O Celta logra un empate en Eibar (1-1) e mantense nos postos altos da táboa de Primeira grazas ao gol de Aspas. O Lugo iguala na casa ante o Zaragoza (0-0) e segue invicto. Na 2ªB, o Racing de Ferrol venceu no derbi ao Pontevedra (1-0) e colócase líder.
O voto por correo sobe un 56% e fai prever unha alta participación no #27S. Máis de 130.000 foron os solicitantes.
Xulio Ferreiro alerta dos "pactos de cúpulas" e pide unha candidatura galega cidadá "máis alá" de Podemos para as xerais. O alcalde da Coruña cre que a formación de Pablo Iglesias é "imprescindible pero non suficiente" e avoga pola "horizontalidade".
Pablo Iglesias cre que o preacordo en Galicia "reforza a aposta por un proxecto plurinacional de cambio" e agradece a Beiras e Yolanda Díaz a súa "xenerosidade".
O BNG solicita a comparecencia da ministra Tejerina polo acordo lácteo para que explique a negativa do Goberno a incorporar demandas básicas para os gandeiros. O pacto non foi apoiado nin polo SLG nin por UUAA.
A Coruña propón baixar a taxa da auga e subir o IBI aos pisos baleiros dos bancos. O goberno da Marea Atlántica comezará a vindeira semana a negociar os orzamentos de 2016 coa oposición.
As pensións non contributivas galegas caen ao mínimo dos últimos vinte anos. O número de perceptores queda en 42.000.
A Deputación de Pontevedra retira as axudas ás touradas co apoio de PSdeG e BNG e a negativa do PP. A presidenta Carmela Silva revelou que o organismo provincial gastou máis de 120.000 euros en publicidade entre 2009 e 2014.
Anova aclara que o seu representante na coordinadora de Marea Pontevedra, David Carballal, renuncia á mesma "por incompatibilidade temporal coas dedicacións que ten en Anova", pero sinala que, ao contrario do publicado este venres, non implica que lle retire o apoio á plataforma. "Anova seguirá apostando pola confluencia das organizacións e as mareas cidadás", indica nun comunicado.
A xuíza do caso Patos ratifica as imputacións de Caballero, Louzán e a delegada da Xunta en Vigo. As imputacións son todas as solicitadas pola Fiscalía agás tres. Máis información, hoxe en Praza.