A nova investidura de Rajoy comezará este mércores ás 18:00 e Rajoy será elixido presidente polo Congreso, previsiblemente, o vindeiro sábado. Así o vén de confirmar a presidenta do Congreso despois de que o líder do PP evidenciase que acepta a formación de goberno.
Pecha a histórica empresa téxtil Caramelo. A propiedade da firma, o grupo Inveravante de Manuel Jove, presentou a proposta de liquidación esta mañá nos xulgados mercantís da Coruña. A compañía presentara concurso de acredores en 2013. Máis información, hoxe en Praza.
O PP e Manuel Martínez (ex-PSdeG) bloquean todos os asuntos do pleno da Deputación de Lugo. Fixérono para protestaren porque o presidente tramitou unha moción como rogo. Unha das iniciativas rexeitadas estaba vinculada aos bombeiros provinciais. Recólleo El Progreso
O grupo Quempallou dá "por finalizada a súa actividade" tras case dúas décadas de carreira musical. Véñeno de anunciar a través das súas redes sociais
O presidente dos bispos españois chama a "dicir non á ideoloxía de xénero" porque "é pouco serio separar o sexo do xénero". Recólleo eldiario.es
A venda das centrais hidroeléctricas de Ferroatlántica ameaza 400 empregos en Dumbría e Cee. Os grupos da oposición galega veñen instando a Xunta a mediar no conflito. Cóntao La Opinión
En Marea cualifica de “golpe de réxime” a investidura de Rajoy coa abstención do PSOE. Así o dixo a súa portavoz no Congreso, Alexandra Fernández, tras a súa reunión co Rei no marco da rolda de consultas do Xefe do Estado. “Unha cousa é a lexitimidade dunha votación dentro do Congreso e outra cousa é a lexitimidade do sentido común e da maioría social”, engadiu.
Oito baróns do PSOE piden a Fernández que a abstención sexa só de 11 deputados. Os secretarios xerais en oito comunidades piden unha xuntanza co presidente da xestora.
Un documental da BBC di que refuxiados sirios son explotados por provedores de Zara, Mango ou H&M. Traballan até 12 horas diarias e sen as condicións de seguridade axeitadas.
O BNG pide á Comisión de Peticións do Parlamento Europeo que ampare xa ás vítimas de Angrois. Hai case dous anos que os afectados solicitaron ser escoitados e aínda non lles deron data. A voceira nacionalista en Bruxelas, Ana Miranda, denuncia presións de PP e PSOE para adialo.
