🏳️🌈
Susana Díaz fai oficial en Madrid a súa candidatura co apoio de Felipe González, Guerra, Zapatero, Bono, Rubalcaba, Chacón e os presidentes autonómicos socialistas. A andaluza pon distancia con Podemos: "unha cousa é pactar con outro partido e outra é entregar o PSOE ou imitar o modelo do outro". Pedro Sánchez tamén se rodea de milleiros de persoas en Valencia destacando que "o PSOE debe elixir entre ser un partido do século XX ou do XXI"
Integrantes da Plataforma de Vítimas do Alvia entréganlle a Felipe González e José Luis Rodríguez Zapatero a petición para que se cree no Congreso unha comisión de investigación sobre o sinistro, e demandándolles o apoio do PSOE, que nos últimos dous anos vetou en varias ocasións esta proposta
Un xulgado coruñés arquiva outra denuncia contra o Concello polo cartel do entroido. O Xulgado de Instrucción número 8, a diferenza do número 3 (ao que terá que acudir o concelleiro de Culturas), rexeita que haxa delicto en representar alguén disfrazado de Papa aínda que isto poida ser "irreverente" para algunhas persoas
Varios colectivos sociais manifestáronse xunto a Podemos na tarde do sábado polas rúas de Santiago para reclamar o cumprimento do artigo 25 da Declaración dos Dereitos Humanos, que determina o dereito de todo individuo a acceder a "vivenda, sanidade e traballo".
Esta madrugada cambia a hora, de xeito que ás dúas serán as tres. O domingo o sol sairá ás 8:27 e se ocultará ás 20:52. O Consello da Cultura presentou esta semana un libro con traballos de catro autores que debaten sobre a necesidade de mudar o fuso horario
O presidente da xestora do PSOE, Javier Fernández, carga contra Pedro Sánchez, sinalando que "democratizar o partido non é convertelo nunha asemblea permanente" e afirmando que o PSOE "non debe ser unha plataforma ao servizo dun líder"
Podemos Galicia crea unha "comisión de consensos" integrada tanto polo sector oficial coma polo sector crítico do seu Consello Autonómico. A pasada semana a metade máis un dos integrantes do máximo órgano de dirección reuníronse sen a presenza de Carmen Santos e aprobaron cambios na Executiva da formación
A Coruña e Santiago acollen esta mañá novos encontros de rendición de contas nos barrios dos seus respectivos gobernos municipais. O Dillo ti herculino celébrase na Sagrada Familia e o Ao Vivo compostelán na zona Rural Norte
Unhas 2.400 persoas inscribíronse para participar na XVI Asemblea Nacional do BNG, que se celebra este sábado e domingo na Coruña. A apertura do plenario está prevista para as 17 horas, dando paso aos discursos de Francisco Jorquera e Ana Pontón. Ás 17.30 presentarase o Informe do Consello Nacional. E ás 18 horas comezará o debate de emendas en comisións.
A Inspección de Traballo, que este venres iniciou a mediación no conflito laboral de Pescanova a instancias da Xunta, fixou tres xuntanzas entre a CIG, CUT, UGT e USO e a dirección da empresa para abordar o incremento salarial, a flexibilidade e as novas categorías laborais