Abanca merca a rede do portugués Banco Caixa Geral en España por 364 millóns de euros. O Consello de Ministros de Portugal vén de anunciar que a entidade herdeira das antigas grandes caixas galegas se impuxo na poxa pola entidade do país veciño. Abanca destaca nun comunicado que vai "incrementar o seu volume de negocio en 7.000 millóns de euros".
O Tribunal Constitucional sentencia que os gobernos en funcións si teñen que estar sometidos ao control parlamentario. Dá así a razón ao Congreso no conflito de atribucións formulado mentres o Goberno de Rajoy estivo en funcións, cando se negou a ser controlado. "A función de control que corresponde ás Cortes está implícita (...) na forma de goberno parlamentario" e non lles pode ser "negado", subliña a sentenza.
120 catedráticos e docentes universitarios de Dereito rexeitan nun manifesto as acusacións de sedición e rebelión contra os dirixentes independentistas cataláns. Un dos profesores que promoven o texto é José Ángel Brandariz, da Universidade da Coruña.
Berta Dávila gaña a XIX edición do Premio de poesía Díaz Jácome para novos creadores coa súa obra Limiar. O certame convócao o Concello de Mondoñedo en colaboración coa Deputación de Lugo.
O Tribunal Superior anula o intento da Xunta de elixir por libre designación catro xefes de servizo de Sanidade e o Sergas. O TSXG, nunha sentenza agora divulgada, atende un recurso presentado por CCOO contra a modificación da relación de postos de traballo aprobada polo Goberno galego en xullo do ano pasado porque non xustificou as razóns polas que eses postos teñen que ser cubertos a dedo e non cun proceso selectivo.
O PP abstense na condena ao franquismo no Senado porque para secundala esixía pedir a prohibición de "ideoloxías populistas" e de organizacións comunistas. Ciudadanos, UPN e Foro Asturias tamén se abstiveron nesta moción do PSOE, que saíu aprobada.
Fillas e fillos de mulleres asasinadas polas súas parellas ou ex-parellas serán indemnizadas pola Xunta, segundo anunciou o vicepresidente Rueda no Parlamento.
O Tribunal Superior de Xustiza de Galicia comeza a tramitar o recurso de Antón Sánchez (En Marea) contra a Xunta por non lle entregar documentación sobre a fusión de Caixa Galicia e Caixanova que vén reclamando dende o ano 2013. Entre os papeis reclamados figura a "carta de encargo" do Goberno galego á consultora KPMG, autora do informe sobre a fusión que a Xunta presentara como "auditoría" malia non ser tal.
António Costa, primeiro ministro luso, arrefría o AVE Lisboa-Madrid e abre a porta a outras conexións máis necesarias para Portugal nunha entrevista coa axencia EFE co gallo da Cimeira Ibérica que se celebra este mércores en Valladolid. “Temos que dar tempo ao tempo para que a inserción de Portugal na rede de alta velocidade na Península Ibérica se faga realidade e non necesariamente nesa conexión de Lisboa-Madrid, tal vez por outros camiños aos que necesitamos chegar máis apresa”, di. A Cimeira Ibérica de Valladolid é a trixésima, das que dez se celebraron na Meseta, oito en toda a Eurorrexión e só dúas en Galicia.
A Iniciativa Lexislativa Popular polo bosque autóctono non seguirá tramitándose no Parlamento. O PP votou en contra no debate de toma en consideración da iniciativa, mentres que o PSdeG se abstivo e En Marea e mais o BNG votaron a prol. Entre as súas medidas figuraba a implantación dunha moratoria á expansión do eucalipto.
