En 189 concellos é festiva algunha das xornadas entroideiras
Aquí é festivo no Entroido? Velaquí un mapa para resolveres de vez unha das dúbidas máis habituais nestes días de festa. No calendario laboral deste 2026 cando menos unha das xornadas entroideiras é día de non traballar en 189 concellos.
A lexislación permite aos municipios escolleren dous festivos cada ano. Máis da metade elixiron o 17 de febreiro, Martes de Entroido e día non laborable en 167 concellos. Noutros dous -Monfero e Vilarmaior-, o festivo do martes chega tras un luns tamén festivo e en sete (Vilariño de Conso, Cambados, Caldas de Reis, Sarreaus, Noia, Beariz e Porto do Son) o elixido é só o Luns de Entroido.
Como amosa o mapa, o Martes de Entroido é festivo na maioría da provincia de Lugo e tamén na maior parte do territorio administrativamente na provincia coruñesa, mentres que tende a desaparecer ao irmos cara ao sur dende as comarcas de Bergantiños ou Ordes.
No territorio entroideiro por excelencia, Ourense, tamén son maioría os concellos que optan polo martes pero en ata oito é festivo o Mércores de cinza: Viana, Cualedro, Vilardevós, Oímbra, Laza, Monterrei, Verín e Castrelo do Val. Fóra da provincia ourensá, o Mércores de Cinza é festivo na cidade de Pontevedra e mais en Cuntis, Ares, Outes e Fene.
- INTERACTIVO | Estes son os festivos no teu concello en 2026
