Fiúncho, Fento macho, Codeso, Abeloura ou Herba de San Xoán, Malva, Romeu e a Herba Luísa son algunhas das sete herbas máis habituais, pero hai moitas outras
Chega o San Xoán, a noite máis curta do ano, que se ilumina entre cacharelas e lumieiras en todos os recunchos do país. Unha celebración que arrecende a sardiñas e que leva aparellada un gran número de tradicións pagás, dende o salto das nove ondas ata a recollida de herbas e flores para lavar a cara con elas e co orballo da noite na mañá do 24.
Son moitas as persoas que nestes días se dedican a facer o cacho, é dicir, a recoller as "herbas de San Xoán" para facer a axeitada mestura coa que se purificar. Xa se sabe que "no san Xoán, fouciña na man". Hai que xuntar sete herbas distintas; algunhas delas son case obrigadas, polo feito de ser as máis comúns na maior parte de Galicia, pero outras varían moito duns lugares a outros, en función da súa dispoñibilidade.
O etnógrafo Xesús Taboada Chivite fixo relación dalgunhas das máis habituais, como recolle a Galipedia, unha lista na que non poden faltar o fiúncho, o fento ou a propia abeloura ou herba de San Xoán, ademais de follas de sabugueiro e outras flores e herbas. A listaxe non é casual, pois moitas delas son as especies que máis agroman nesta época do ano, e as propiedades máxicas de moitas delas están máis que estudadas pola ciencia, que leva séculos empregando moitas delas para fins medicinais ou cosméticos.
A propia abeloura ou Herba de San Xoán ten propiedades cicatrizantes, adstrinxentes e antisépticas. Lavar a cara coa súa auga achega, polo tanto, benficios para a pel e di o refraneiro que "a herba de san Xoán limpa a cara de grans".
Xa se sabe que "no san Xoán, fouciña na man"
Fiúncho, Fento macho, Codeso, Abeloura ou Herba de San Xoán, Malva, Romeu e a Herba Luísa son as sete herbas referidas por Taboada Chivite, pero hai moitas outras, coma a Dedaleira, o Trobisco, a Espadana, a Herba de Nosa Señora ou Artemisa, a Macela ou Matricaria, a Herba punteira ou Sempreviva dos tellados e a Roseira brava. Tamén as follas e flores de sabugueiro, as follas de amieiro, de nogueira, de hedra, de figueira, de laranxeira, de castiñeiro ou de visgo. E outras especies que se poden atopar nalgún paseo polos arredores das casas ou achegándose ao monte, como tomiño, ruda, hortelá, ourego, loureiro, hortensia ou herbas de san Pedr
Herbas de San Xoán
-
Fiuncho (Foeniculum vulgare) -
Fento macho (Dryopteris filix-mas) -
Codeso (Adenocarpus complicatus) -
Abeloura ou Herba de San Xoán (Hypericum perforatum) -
Malva brava ou Malva común (Malva sylvestris) -
Romeu (Rosmarinus officinalis) -
Herba luísa (Aloysia citriodora) -
Dedaleira ou Estraloque (Digitalis purpurea) -
Trobisco (Daphne gnidium) -
Lirio amarelo (Iris pseudacorus) -
Herba de Nosa Señora ou Artemisa menor (Artemisia vulgaris) -
Macela (Matricaria recutita) -
Roseira brava ou silva macho (Rosa canina) -
Sabugueiro (Sambucus nigra)
O seu uso e a popularidade desta tradición está moi presente en ditos, refráns e fórmulas como "En san Xoán, as bruxas fuxirán" e fórmulas como "Corre, meniña, vaite lavar, alá na fonte te has de lavar, e a fresca auga desta amañecida cor da cereixa che ten que dar".
Así pois, neste San Xoán, benvida sexa a tradición de recoller e xuntar herbas e flores para lavar con elas a cara na mañá do día 24, ben sexa por confiar nas propiedades destas plantas, ou ben polo pracer de dar un paseo polo monte na procura de herbas e de natureza. Unha boa forma, abofé, de celebrar o solsticio de verán e de gozar da explosión de vida vexetal destes días.