A carta na que Rueda se ofrece a negociar co persoal da Xustiza "sempre e cando se suspenda a folga"

Alfonso Rueda, nunha visita aos xulgados de Ferrol © Xunta

Alfonso Rueda lanzou o órdago: sentará a negociar co comité de folga do persoal de Xustiza en Galicia sempre que este desconvoque o paro que suma 16 días efectivos e máis de tres semanas. Os sindicatos rexeitaron unha opción que consideran --ao igual que a oposición-- unha "chantaxe" e advirten de que seguirán cunha protesta que acumula entre 8.000 e 9.000 xuízos suspendidos. Queren que o vicepresidente da Xunta se incorpore á negociación e ofreza unha solución para logo valorar a fin ou non da folga.

Rueda advírtelles aos sindicatos que se incorporará á negociación "sempre e cando se suspendan os paros"

A oferta de Rueda chegou a través dos medios de comunicación e "horas despois", segundo os sindicatos, o comité recibiu unha carta do vicepresidente. "Non deixa de ser curioso", aseguran. Nela, o número dous da Xunta e máximo responsable do sector da Xustiza di non ter "inconveniente" en "participar" nas conversas "xunto co director xeral de Xustiza e o de Función Pública", este último vetado polos representantes dos traballadores. E advirte de que só se incorporará a estes encontros "sempre e cando se suspendan os paros mentres se produce a negociación e a cidadanía deixe de verse afectada por esta parálise nos xulgados galegos". 

Rueda lémbralle na misiva, á que tivo acceso Praza.gal, ao presidente do comité de folga que "van xa 16 xornadas de paro" e que "malia os servizos mínimos" este "está a causar unha considerable parálise nos xulgados galegos e notables prexuízos para toda a cidadanía". Ademais, advírtelle de que o comité de folga "abandonou ata en tres ocasións a mesa de negociación" na que a Xunta tería ofrecido "unha xenerosa oferta económica que sitúa os salarios dos funcionarios e funcionarias galegos por riba da media estatal en todas as categorías laborais, o cal precisamente era unha das principais reclamacións sindicais".

"O único responsable de que a Xustiza estea paralizada é o propio Alfonso Rueda", advirte o comité de folga

O comité de folga responde asegurando que "o único responsable de que a Xustiza estea paralizada é o propio Alfonso Rueda" ao que acusan de "negar dende o minuo un calquera opción de negociación, mantendo  unha actitude prepotente e mentindo constantemente aos medios sobre as reivindicacións". Aseguran que Xunta e conselleiro "néganse a asumir o mandato de todo o Parlamento" e critican de novo a José María Barreiro, director xeral de Función Pública, ao que censuran polo seu ton negociador e de quen piden a súa marcha da mesa. 

"Non existe motivo ningún que xustifique que suspendamos as mobilizacións", aseguran os sindicatos

O comité insiste en "deixar claro" a Rueda que "non se van suspender as mobilizacións" porque, explican, "non existe motivo ningún que o xustifique e moito menos porqueu o solicite a persoa queu estivo escapada da mesa utilizando interlocutores que nada teñen que ver con Xustiza". "Se o conselleiro quere desbloquear o conflito, teno moi fácil: que nos cite inmediatamente a unha reunión, presentándose cuha oferta seria e xusta para o noso colectivo,a partir da cal poidamos empezar a negociar de verdade", din. "Nese caso, as organizacións sindicais estamos dispostas a estudar todas as posibilidades para chegar a un acordo", rematan en resposta a unha misiva na que o vicepresidente amosa a súa "firme e decidida vontade" de chegar a ese acordo "canto antes". Polo momento, segue lonxe. 

Fragmento da carta de Alfonso Rueda ao comité de folga CC-BY-SA Praza Pública

Despece

  • Feijóo acusa os partidos da oposición de "estar agora detrás do conflito na Xustiza"

    Núñez Feijóo acusou os partidos políticos da oposición de "estar agora detrás do conflito" na Xustiza. O presidente da Xunta asegura que, logo da proposta do vicepresidente Rueda de incorporarse á negociación se o comité de folga suspendía o paro, "os primeiros que contestaron non foron os sindicatos", senón "os partidos políticos". "Isto significa que este conflito se politizou", insistiu. 

    "A Xunta non pode chegar nin preto nin aproximado á proposta dos sindicatos", di Feijóo

    Ademais, na rolda de prensa posterior ao Consello, Feijóo aclarou en que a Xunta "non pode chegar nin preto nin aproximado á proposta dos sindicatos", en referencia á reclamación salarial, e dixo non comprender "o interese dalgunha central por prolongar o desacordo" porque, aacusou, "hai actos previstos" de protesta "para dentro de oito días". 

    "A proposta do vicepresidente paréceme bastante razoable", engadiu Feijóo, que advertiu que "en ningún caso" vai cesar a Rueda. "Os galegos non merecen ter familiares, máis de mil, que lamentablemente morreron e que non se lles estende a acta de defunción", dixo, tras declararse "sorprendido" de que "non haxa nin tan sequera un período de tregua para falar". "Sempre hai treguas en todos os conflitos", rematou, antes de asegurar que, tendo en conta os datos de descontos das nóminas por acudir á folga, o seguimento é "do 37 ou 38%".

    Feijóo, en presenza de Rueda nun comité de dirección do PPdeG CC-BY-SA PPdeG
  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza