O lema "oficialidá" presidiu as principais pancartas e espallouse polas redes sociais
Retomando as importantes mobilizacións sociais previas á pandemia da COVID, pero agora coa expectativa da anunciada reforma do Estatuto de Autonomía do Principado, a Xunta pola Defensa de la Llingua Asturiana convocou este sábado en Oviedo unha manifestación de impulso da oficialidade do asturiano e do galego-asturiano que tornou en marcha masiva.
Manifestación pola oficialidade do asturiano e o galego-asturiano
-
Unha imaxe da manifestación en defensa da oficialidade do asturiano -
Unha imaxe da manifestación en defensa da oficialidade do asturiano -
Unha imaxe da manifestación divulgada por Iniciativa pol Asturianu (@IniciativaxAst) -
Imaxe da manifestación en defensa do asturiano e o galego-asturiano -
Imaxe da manifestación divulgada pola Xunta pola Defensa de la Llingua Asturiana
O actual Estatuto do Principado sinala que "o bable [sic] gozará de protección. Promoverase o seu uso, a súa difusión nos medios de comunicación e o seu ensino, respectando en todo caso as variantes locais e a voluntariedade na súa aprendizaxe", unha redacción que elude a oficialidade. Pero agora o presidente socialista da comunidade, Adrián Barbón, vén de anunciar a apertura dun proceso de reforma do texto no que quere incluír a oficialidade do asturiano e do galego-asturiano, galego de Asturias ou eonaviego, a variante da lingua galega que se fala no occidente asturiano e que conta cuns 45.000 falantes.
Para apoiar e impulsar a oficialidade este sábado milleiros de persoas marcharon polas rúas de Oviedo con pancartas nas que destacaba sobre os demais un lema, "oficialidá", que tamén se espallou polas redes sociais.
"40 anos de atraso con respecto a outras comunidades, como Galicia, é algo que nos pasa factura. Nestas décadas perdéronse moitos falantes e perdeuse moita lingua", salienta a Xunta pola Defensa de la Llingua Asturiana
Nos días previos á marcha deste sábado o voceiro da Xunta pola Defensa de la Llingua Asturiana, Xosé Candel, salientaba en conversa con Praza.gal a importancia de aproveitar a oportunidade que agora se abre de reforma do estatuto. "Sempre dicimos que imos tarde, pero o caso é non ir tarde de máis e aproveitar esta oportunidade de salvar a lingua asturiana", dicía Candel, que salientaba como os "40 anos de atraso con respecto a outras comunidades autónomas, como Galicia, é algo que nos pasa factura. Nestas décadas perdéronse moitos falantes e perdeuse moita lingua, moito vocabulario e expresións".
