• Lugares e horarios das mobilizacións feministas convocadas para este venres
• A USC remite á Fiscalía os vídeos de Luciano Méndez sobre 'La Manada' por se puidesen constituír un delito

O feminismo galego volveuse botar á rúa. En cuestión de horas dende que transcendeu a decisión da Audiencia de Navarra de deixar en liberdade provisional baixo fianza de 6.000 euros aos cinco membros de 'La Manada', movementos feministas como a Marcha Mundial das Mulleres e a Plataforma Feminista Galega, ademais de diversas organizacións locais, mobilizáronse ao berro de "non é abuso, é violación" e contra o que consideran motivacións "patriarcais" da xustiza. Este venres continúan as mobilizacións contra unha decisión que denota que o tribunal xa non ve risco de fuga nin risco de reiteración delituosa. Con todo, como informa Ana Requena Aguilar para eldiario.es, noutras dúas ocasións (xullo e setembro de 2017), antes da condena, o mesmo tribunal si viu claro que a conxunción deses dous factores xustificaba a prisión provisional.

O 14 de xullo de 2017, a sección segunda da Audiencia Provincial de Navarra, presidida polo maxistrado José Francisco Cobo, ditaba un auto no que mantiñan a prisión preventiva para os cinco acusados e desestimaba a petición de liberdade das defensas. A prisión provisional, dicían, debe responder á existencia de "motivos dabondo para crer responsable criminalmente dos delitos á persoa afectada" así como cumprir con determinados preceptos que ponderen dereitos.

Daquela, o xuízo aínda non se celebrara, pero estaba preto. Precisamente, esa proximidade, dicían os xuíces, concretaba "o perigo de eludir a acción da xustiza". É dicir, apreciaban risco de fuga. Non só, tamén o risco de reiteración delituosa "nunha actuación  grupal". "Ambos os riscos están latentes, sen que os mesmos queden impedidos polas circunstancias persoais, familiares, económicas e de integración social do procesado", explicaban.

Noutras dúas ocasións antes da condena o mesmo tribunal si viu claro que a conxunción do risco de fuga e de reiteración delituosa xustificaba a prisión provisional dos cinco acusados

No auto tamén mencionaban que o tempo transcorrido en prisión provisional debe aplicarse con proporcionalidade. Os xuíces mencionaron unha sentenza do Tribunal Europeo de Dereitos Humanos na que se establecía que o tempo en prisión preventiva debe ir acompañado do desenvolvemento de procedemento xudicial, algo que, subliñaron, dábase neste caso. "O desenvolvemento do proceso está a producirse en condicións temporais adecuadas e explicables polo grao de complexidade do obxecto que o integra", puntualizaban.

Ese razoamento, que concluía co mantemento da prisión provisional, contaba cun voto particular, o do xuíz Ricardo González, o mesmo maxistrado do voto particular á sentenza no que avogaba pola súa total absolución. González defendía a posta en liberdade e destacaba "o carácter de excepción" da prisión provisional, "e en maior medida se cabe cando á toma dunha decisión respecto diso precede un considerable tempo de privación de liberdade". Non había argumentación ningunha, dicía, que apoiase que existía un risco certo de reiteración delituosa. O maxistrado tamén achegaba sentenzas europeas para avalar a súa decisión.

_{Mobilización na Coruña / Praza Pública}

Motivación proporcional

En setembro de 2017, e tras unha nova petición de liberdade por parte das defensas, o tribunal volveu expoñer os mesmos argumentos. As defensas utilizaron o anterior voto particular de Ricardo González para apoiar a súa solicitude. Con todo, o auto insistiu: "A resolución maioritaria atense aos módulos de motivación suficiente, proporcional e razoable".

O tribunal defendeu a súa anterior resolución, na que, subliñaban, realizaron un xuízo de ponderación "dos intereses en xogo de forma individualizada, motivada e razoada, contemplando a totalidade de circunstancias persoais, familiares e sociais do procesado, así como as relacionadas co avance da tramitación procesual. Conscientes do sacrificio que para a liberdade do procesado supón a decisión de mantemento da prisión provisional". O risco de reiteración delituosa non é incondicional, advertían. O maxistrado Ricardo González reiterou o seu voto particular, no que pedía a liberdade para os cinco membros de 'La Manada'.

_{Mobilización en Ferrol / EU Ferrol}

Liberdade provisional

Catro dos cinco condenados teñen pendente outro caso por abusos a unha moza

Desta volta, o equilibrio de forzas da sección segunda da Audiencia de Navarra cambiou. Só o presidente, José Francisco  Cobo, defendeu que o cinco xa condenados deben permanecer en prisión ata coñecer a sentenza firme. A Ricardo González sumouse a maxistrada Raquel Fernandino: os dous votaron a favor da liberdade provisional de 'La manada'. Agora falta por ver cales son os seus argumentos, especialmente despois dunha condena a nove anos de prisión que data de hai só tres meses.

O próximo 7 de xullo os cinco condenados ían cumprir dous anos de prisión provisional, o máximo contemplado na lei agás en determinadas circunstancias. O risco de fuga ou de reiteración delituosa poden facer que esa medida cautelar se amplíe ata a metade da pena, neste caso 4,5 anos. Tras os recursos de ambas as partes, o Tribunal Superior de Xustiza de Navarra pronunciarase de novo no outono sobre a sentenza que lles condena por acoso sexual. Ademais, catro dos cinco membros de 'La manada' teñen pendente outro caso, agora en  Pozoblanco (Córdoba) por abusos a unha moza.  De momento, os cinco sairán este venres de prisión.