O Consello de Contas reprocha aos concellos medianos que non planifiquen orzamentos específicos para avanzar na súa dixitalización
O Consello de Contas fixo público este mércores un informe sobre o grao de implantación da administración electrónica nos concellos galegos e sobre a axuda que reciben por parte das deputacións provinciais. O ente fiscalizador das contas públicas conclúe que a Deputación de Ourense é a que menos axuda os municipios máis pequenos e reprocha aos concellos medianos que non planifiquen a súa dixitalización establecendo programas orzamentarios específicos para avaliar o seu custe.
Segundo o Consello de Contas, as deputacións de Pontevedra e A Coruña son as que máis colaboran cos concellos na súa dixitalización e todos os municipios que a solicitaron recibiron asistencia delas. A deputación coruñesa presta o servizo de xeito directo, mentres que a pontevedresa faino a través dunha empresa contratada, da que consta certificada a súa calidade. As dúas deputacións prestan eses servizos de asistencia aos concellos a partir dunha “avaliación inicial da que se extrae un plan de implantación, se ben unicamente a Deputación de Pontevedra emite informes de seguimento do mesmo”.
Segundo Contas, "a intensidade da asistencia prestada" pola Deputación de Ourense aos seus concellos "é a máis baixa das catro deputacións"
Pola contra, no caso da Deputación de Lugo “a asistencia circunscríbese ao ámbito económico”, con subvencións aos concellos polos custos que teñan por implantar a administración electrónica. E no caso da Deputación de Ourense, Contas constata que “a intensidade da asistencia prestada” é “a máis baixa das catro deputacións, prestándose unicamente o servizo de cartafol cidadán e hosting, o que supón un incumprimento das competencias atribuídas” pola lei de bases de réxime local. O informe de Contas relata como a deputación ourensá chegou a formalizar un contrato cunha empresa para axudar aos concellos, pero abandonouno en 2019 “pois case todos os concellos da provincia xa tiñan optado por outra solución”.
O informe do Consello de Contas tamén analizou os servizos de administración electrónica cos que contan os concellos medianos, de entre 10.000 e 20.000 habitantes. A análise debía realizarse sobre o total de 34 concellos dentro dese rango de poboación, pero 13 deles non colaboraron co Consello de Contas: Boiro, Sada, Teo, Vilalba, Barbadás, O Carballiño, Baiona, Cambados, Gondomar, Nigrán, O Grove, O Porriño e Tomiño.
Contas critica que 13 dos 34 concellos de entre 10.000 e 20.000 habitantes non colaboraron remitíndolle información sobre a súa administración electrónica
Dos restantes 21 concellos que si achegaron información ao Consello de Contas, o órgano fiscalizador conclúe que “ningún dos concellos examinados planificou as súas necesidades organizativas, técnicas e materiais, nin elaborou un calendario de implantación como paso previo ao desenvolvemento dos servizos de administración electrónica”. Nesa liña, o informe reprocha que os concellos non planifiquen orzamentos específicos para avanzar coa súa dixitalización, o que á súa vez dificulta fiscalizar os gastos que supón a mesma.
Canto aos servizos dos que dispón a administración electrónica dos concellos analizados, todos teñen sede electrónica, rexistro electrónico ou factura electrónica, pero só 9 contan con arquivo electrónico único e só 4 con rexistro electrónico de apoderamentos, que facilita os trámites ás empresas: Rianxo, Sarria, Mos e Poio.