O ente fiscalizador considera que os "defectos graves" existentes na documentación que analizou "impiden considerala como conta rendida", fronte ao que a institución que preside Baltar alegou que un ciberataque afectara ao proceso
O Consello de Contas, ente independente encargado da fiscalización das administracións públicas galegas, vén de facer público un informe no que analizou a Deputación de Ourense durante o exercicio 2018 e no que censura a elevada porcentaxe de contratos menores e de subvencións nominais que a institución que preside José Manuel Baltar entrega a dedo sen concursos, procesos abertos ou de libre concorrencia. O Consello de Contas tamén considera que os “defectos graves” existentes na documentación que lle remitiu a Deputación sobre as súas contas de 2018 “impiden considerala como conta rendida”, fronte ao que a Deputación alegou que o ciberataque que recibiu a finais de 2019 afectara ao proceso de rendición. Porén, o ente fiscalizador non creu as súas explicacións e censurou a demora en tomar medidas para resolver o problema informático.
A existencia do informe de Contas, aprobado e feito público hai uns días polo ente fiscalizador pero que aínda non transcendera, foi revelada este martes polo PSdeG, cuxo secretario xeral, Gonzalo Caballero, fixo responsable a Feijóo "da dedocracia e a opacidade que Baltar instaura en Ourense".
En materia de contratos, Contas reflicte como do total de 9,8 millóns de euros adxudicados pola Deputación en 2018 o 80%, uns 7,8 millóns de euros, tramitáronse a través de contratos menores de obras ou servizos, que poden ser entregados discrecionalmente sen pedir ofertas a varias empresas por non superar o límite legal de 40.000 euros no caso das obras ou os 15.000 euros no dos servizos. Foron 434 contratos menores, fronte a 36 non menores que sumaron 1,9 millóns.
Ademais, Contas censura a concentración de adxudicatarios rexistrada nos contratos menores de obras, 170 do total que suman 6,1 millóns, dos que 112 contratos foron parar a só 5 empresas. E sinala que hai contratos menores “como o servizo de reparación de vehículos, que polo seu obxecto teñen carácter recorrente e vanse repetir en anos sucesivos” pero que a Deputación adxudica individualmente en vez de convocar un concurso que permita sistematizar e abaratar o servizo.
Por outra banda, Contas sinala que a Deputación só publica na plataforma de contratación do sector público os contratos menores financiados con fondos europeos.
Contas censura que a Deputación só publica os contratos menores que son financiados con fondos europeos e non publica as subvencións na base de datos estatal
Canto ás subvencións, o ente fiscalizador di que “contrariamente á regulación” das leis de subvencións tanto estatal como galega, “que dispoñen que o procedemento ordinario de concesión de subvencións tramitarase en réxime de concorrencia competitiva, o procedemento de concesión de subvencións máis empregado foi a concesión directa nominativa”, un procedemento non sobrevido durante o ano senón xa previsto nos orzamentos da Deputación para ese ano e que representa “o 84% das subvencións concedidas no exercicio 2018”. Por esa vía entregáronse 7,4 dos 8,8 millóns de euros en subvencións de 2018.
Son unhas subvencións directas que ademais, di Contas, a Deputación non publica, como é a súa obriga, na base estatal de subvencións.
No seu informe Contas tamén censura que a Deputación non dispón dunha suficiente estrutura de persoal para dar cobertura ás esixencias en materia de control financeiro, que non remitiu “información sobre a subscrición de calquera tipo de convenio que supuxese compromisos económicos de máis de 600.000 euros” e constata que volveu enviarlle documentación a comezos deste ano tras supostamente detectar o efecto do ciberataque sobre a que xa enviara previamente. Porén, malia que Contas di que analizará a nova documentación, desbota o motivo da alegación e lembra que hai ano e medio que o propio ente fiscalizador avisara á Deputación da falta de documentación, ao tempo que critica a lentitude en actuar ante un problema tan serio de seguridade informática.
Contas tamén vén de publicar un informe sobre o Concello de Vigo no que sinala "defectos leves" nas súas contas, censura o exceso de subvencións directas e constata o incumprimento da estabilidade orzamentaria que supuxo o rescate do Auditorio Mar de Vigo
Ademais do informe sobre a Deputación de Ourense, Contas tamén vén de publicar outra análise sobre o Concello de Vigo no mesmo exercicio 2018. No seu caso o ente fiscalizador cualifica como “leves” os defectos detectados nas súas contas, nas que tamén censura o exceso de subvencións e convenios de tipo nominativo, 93, fronte a 23 por concorrencia.
Igualmente, Contas tamén censura que o Concello de Vigo entregue con contratos menores servizos recorrentes todos os anos. Porén, a diferenza do 80% da Deputación de Ourense, Contas cuantifica no 13% o volume dos contratos menores en relación co total da contratación anual do Concello de Vigo.
Contas tamén constata que en 2018 Vigo incumpriu as regras de gasto e estabilidade orzamentaria nuns 35 millóns de euros, o que o Concello explica co rescate ese ano do Auditorio Mar de Vigo, que rematou supoñendo 70 millóns de euros de custo para as arcas públicas.