“O cheiro é a segunda causa de queixa ambiental despois do ruído en Europa”, di o Goberno galego, que matiza que non sempre a contaminación odorífera ten toxicidade
A Consellería de Medio Ambiente vén de abrir un período de consulta pública ata o 29 de agosto para que calquera cidadán lle achegue ideas ou propostas para crear o denominado Observatorio de Olor de Galicia. A idea do Goberno galego, no marco das súas competencias en materia de vixilancia das actividades potencialmente contaminantes, é que este sexa “o primeiro paso que sirva como instrumento de obxectivación do malestar provocado polos olores, transformando a recompilación de datos en información útil e relevante para a toma de decisións”.
Segundo argumenta a Xunta, “o cheiro é a segunda causa de queixa ambiental despois do ruído en Europa, pero a pesar diso, tanto a información como as recomendacións en relación coa contaminación por cheiros son difíciles de atopar e difíciles de entender”. O Goberno galego engade que “cando o olor provoca malestar estamos a falar de contaminación odorífera ou por olores, sen que iso signifique que, indefectiblemente, posúan toxicidade”.
Pero admite que “ao ser os olores un factor para a aceptación, a poboación pode chegar a percibir os olores como un perigo para a súa saúde”, polo que “regular sobre a contaminación por olores non é un tema doado por canto, a diferencia doutros contaminantes atmosféricos, as sustancias odoríferas están presenten en baixas concentracións no aire polo que poden ser difíciles de detectar”.
“Ao ser os olores un factor para a aceptación, a poboación pode chegar a percibir os olores como un perigo para a súa saúde”, di a Xunta
Ante as lagoas de información e coñecemento na materia, e de cara a elaborar un decreto que regule un observatorio do olor, é polo que a Xunta abre a consulta pública á cidadanía antes de redactar, e despois volver a expoñer ao público, o texto definitivo.
De entrada, a visión da Xunta é que o observatorio sexa “un espazo de colaboración para resolver un problema de abordaxe complexo” que “require da fusión da información cuantitativa, procedente de medición, coa cualitativa, derivada da observación e reporte daqueles que a sofren, baixo uns criterios que permitan transformar a análise desta información en medidas concretas”. Será, di o Goberno galego, “un observatorio que pretende investigar, revisar, describir, caracterizar, avaliar, discutir, cuestionar, suxerir e informar a todas as partes interesadas”.
A Xunta prevé que o observatorio se adscriba á Dirección Xeral de Calidade Ambiental, Sostibilidade e Cambio Climático. E detalla cales poden ser a priori as súas funcións:
- Crear as condicións e infraestruturas suficientes para monitorar e validar o comportamento e evolución do problema.
- Promover e fomentar liñas de estudio e investigación que sexan susceptibles de garantir un bo coñecemento, tanto cuantitativo como cualitativo, do complexo problema da contaminación por olores.
- Elaborar un mapa de olores de Galicia.
- Divulgar o coñecemento sobre a realidade do fenómeno da contaminación por olores.
- Formular recomendacións e propostas tendentes a promover a redución, prevención e regulación da contaminación por olores.
- Constituír e actualizar permanentemente un fondo documental especializado que reúna a literatura científica nesta materia a nivel autonómico, estatal, europeo e internacional, así como dun fondo documental normativo nesta materia.
- Elaborar análises documentais baseados na explotación de datos cuantitativos e cualitativos e dos fondos bibliográficos e normativos referidos no apartado anterior.
- Promover a reflexión e o intercambio do coñecemento en rede.