A Xustiza anula outro intento da Deputación de Ourense de pagar ao xornal La Región 2,7 millóns polo seu arquivo

A Deputación de Ourense daba conta en 2017 na súa web da compra do arquivo de La Región, anulada agora novamente pola xustiza © Deputación de Ourense

O xuíz censura que a Deputación fixese pasar os cartos que o xornal tivo que devolverlle por unha condena anterior como se fosen un ingreso extraordinario que a facultaba a empregar outra figura legal coa que pagarlle novamente

Un xulgado do Contencioso-Administrativo de Ourense vén emitir unha sentenza, con data deste mesmo venres, na que volve anular un novo intento da Deputación de Ourense de pagar 2,7 millóns de euros a La Región polo arquivo histórico do xornal. O xuíz censura que a Deputación fixo pasar os cartos que o xornal tivo que devolverlle por unha condena anterior polos mesmos feitos como se fosen un ingreso extraordinario que a facultaba a empregar outra figura legal coa que pagarlle novamente.

Tras unha denuncia orixinal do agora alcalde de Ourense, Gonzalo Pérez Jácome, daquela na oposición e enfrontado a Manuel Baltar, a xustiza xa anulara un anterior intento de compra do arquivo do xornal, sentenza ratificada en 2020 polo Tribunal Superior de Xustiza de Galicia (TSXG) que condenaba a La Región a devolver os 2,7 millóns de euros que lle pagara a Deputación. Pero a continuación a deputación puxo en marcha un novo procedemento para insistir na compra. 

Sentenza que volve anular un novo intento de compra do arquivo de La Región por parte da Deputación de Ourense CC-BY-SA Praza Pública

Cunha autorización do propio presidente, Manuel Baltar, desta segunda volta recorreu a unha denominada “xeración de créditos”, unha das formas das que dispón unha administración “para aplicar a un destino aqueles ingresos non previstos ou contemplados inicialmente no orzamento anual”, en particular ingresos que cheguen de mans privadas para financiar fins propios das administracións. E o que fixo a deputación foi considerar a devolución á que foi condenada La Región como un ingreso non previsto que a través desa “xeración de crédito” decidiu dedicar a pagarlle novamente a La Región

Segundo o xuíz, “o que fixo a Administración é asimilar unha sentenza que anula a previa adquisición realizada pola Deputación Provincial e a conseguinte obriga de La Región de devolver o diñeiro percibido a un compromiso de achega económica por parte de La Región” á deputación. Un procedemento que o maxistrado censura xa que “unha sentenza ordenando a devolución dunha suma que non debeu aboarse non é un compromiso firme de achega para financiar actividades por parte dunha entidade privada, senón unha obriga de restitución do que, conforme á sentenza, non debeu recibirse”.

“Non dubido que a Deputación Provincial faga uso con frecuencia, como declarou a interventora no acto da vista, da figura da xeración de créditos, pero iso non pode supor que se deforme a mesma ata o punto de facela irrecoñecible por non poder incardinala en ningún dos supostos legalmente previstos para o seu uso”, engade a sentenza. 

Sede da Deputación de Ourense Dominio Público Praza Pública

O xuíz censura que a Deputación “está considerando como unha achega dunha entidade privada o feito de que lle devolvan o que é seu” en aplicación dunha condena xudicial previa; "que sexa cómodo ou útil non quere dicir que sexa legal", engade

“Entendo que pode ser moi cómodo acudir á xeración de créditos neste caso para a Deputación Provincial, pero que sexa cómodo ou útil non quere dicir que sexa legal”, di o maxistrado, e engade que “de admitirse este xeito de proceder, poderíase acudir a esa figura de forma fraudulenta, xa que bastaría con celebrar un contrato a sabendas de que vai ser anulado, para posteriormente considerar a sentenza que o anula como un suposto de achega privada, o que habilitaría acudir á xeración de crédito e repetir o mesmo contrato, esta vez coa única intervención da presidencia como órgano competente para a súa aprobación”.

O xuíz constata que en todo caso tres anos despois da anterior condena La Región aínda non devolveu os cartos

A sentenza vai máis alá e di que “neste caso nin sequera hai achega algunha, dado que ese diñeiro que se ten que devolver por La Región era e é da Deputación” e esta “está considerando como unha achega dunha entidade privada o feito de que lle devolvan o que é seu” en aplicación dunha condena xudicial previa.

A nova condena mesmo salienta que tampouco pode falarse dun ingreso por parte de La Región xa que en todo caso a devolución dos cartos “a data de hoxe e case tres anos despois de ditarse sentenza polo Tribunal Superior de Xustiza de Galicia confirmando a anulación da adquisición, segue sen efectuarse”, co arquivo do xornal en poder da deputación e o diñeiro en mans da empresa editora.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.