Alfonso Rueda xura sobre o Estatuto o seu cargo como presidente da Xunta

Toma de posesión de Rueda como Presidente da Xunta © Xunta

Hemeroteca

No seu discurso, o novo mandatario apelou á "normalidade excepcional" da que, asegurou, goza o país e prometeu "traballo" para continuar a xestión do seu antecesor

Alfonso Rueda é xa oficialmente Presidente da Xunta de Galicia, o sexto na historia da Autonomía. Rueda tomou posesión nun acto celebrado no Parlamento no que escolleu xurar o seu cargo (no canto de prometer) pero fíxoo sobre un exemplar do Estatuto. No seu discurso, o novo mandatario apelou á "normalidade excepcional" da que, asegurou, goza o país e prometeu "traballo" para continuar a xestión do seu antecesor.

Rueda ingresou no Salón dos Reis do Pazo do Hórreo acompañado polo presidente do Parlamento, Miguel Ángel Santalices Vieira, polo ex-presidente galego Alberto Núñez Feijóo e pola ministra de Traballo Yolanda Díaz, en representación do Goberno central. Todos eles ingresaron na sala mentres a Banda de Gaitas da Deputación de Ourense interpretaba o Himno do Antigo Reino de Galicia. 

Á toma de posesión asistiron medio milleiro de persoas, encabezadas polas principais autoridades do país, os líderes da oposición parlamentaria, representantes de institucións e de medios de comunicación, e tamén algúns presidentes autonómicos, entre eles a madrileña Isabel Ayuso, ademais do murciano Fernando López Miras e do castelán-leonés Alfonso Fernández Mañueco.

No seu discurso, Rueda asegurou sentirse "libre de hipotecas", pero "cargado de débedas de gratitude"

No seu discurso, Rueda asegurou sentirse "libre de hipotecas", pero "cargado de débedas de gratitude". Rueda prometeu "traballo" para "preservar" Galicia das "tendencias de ruptura", de "experimentos", "modas" e adanismos", co obxectivo de manter a "estabilidade" dun Executivo que levará a "moderación" por bandeira. Recoñeceu que nos últimos anos se mantivo na "sala de máquinas" do Goberno, pero que agora está "preparado" para poñerse "á fronte da ponte de mando".

"Creo nunha comunidade que se manteña a salvo da miopía do localismo e a fragmentación, que co ariete de supostos agravios carga contra a casa común que tanto nos custou e nos está costando construír"

Rueda iniciou o seu primeiro discurso como presidente da Xunta destacando que "poucas visións resumen tan ben a miña concepción sobre esta terra coma a do pontevedrés Valentín Paz Andrade, que se refería a Galicia como unha tarefa" e sinalou que "a Galicia autonómica, plenamente consolidada despois de catro décadas, nace do legado dos galegos que a pensaron e dos que a foron construíndo". 

De igual xeito, na súa intervención Rueda introduciu algúns parágrafos en castelán para salientar que "jamás nos escudaremos en la pluralidad para ahondar en la disgregación. Al contrario, lo que vamos a hacer es reivindicar esa pluralidad como una condición indispensable para mantenernos unidos".

"Creo firmemente nunha Galicia unida, desde a rúa Príncipe de Vigo ou os Cantóns da Coruña ata a praia das Catedrais, desde as terras agrarias da Limia en Ourense ata o os portos pesqueiros do Barbanza, desde a praza do Obradoiro ata o Centro Galego de Bos Aires", dixo Rueda, engadindo que "creo, polo tanto, nunha comunidade que se manteña a salvo da miopía do localismo e a fragmentación, que co ariete de supostos agravios carga contra a casa común que tanto nos custou e nos está costando construír".

Toma de posesión de Rueda como Presidente da Xunta © Xunta

"Son consciente de que estiven moitos anos na sala de máquinas e tamén son consciente de que me toca agora subir á ponte de mando"

Rueda rematou o seu discurso afirmando que "nestes anos preocupeime un pouco menos da relevancia pública e un pouco máis de intentar axudar ao presidente Feijóo nunha tarefa moi difícil que creo que fixo excelentemente". "Son perfectamente consciente de que estiven moitos anos na sala de máquinas e tamén son perfectamente consciente de que me toca agora subir á ponte de mando", concluíu.

"Imos seguir avanzando unidos por esta senda de progreso tranquilo que representa Galicia"

"Imos seguir avanzando unidos por esta senda de progreso tranquilo que representa Galicia; por esta normalidade excepcional que queremos que siga sendo normalidade e que deixe de ser excepcional e que cunda o exemplo noutros sitios, e que xa convertemos na nosa bandeira", rematou

O xa ex-presidente da Xunta, Alberto Núñez Feijóo, no acto de toma de posesión de Alfonso Rueda © Parlamento de Galicia

Despece

  • Pontón propón a Rueda medidas para mellorar a Atención Primaria, o modelo público de residencias e "reconducir" a estratexia eólica

    Pontón diríxese á tribuna para pronunciar o seu discurso na investidura de Rueda CC-BY-NC-SA BNG

    Coincidindo co acto de toma de posesión de Rueda como presidente da Xunta, a portavoz nacional do BNG, Ana Pontón, anunciou a axenda de temas "urxentes" que enviará ao novo responsable do Executivo galego e que a formación nacionalista entende que deben ser tratados "con prioridade". Entre elas figuran medidas para paliar a crise de prezos, sacar a Atención Primaria do colapso, avanzar nun modelo público de residencias e "reconducir a estratexia eólica en beneficio do país".

    Pontón anunciou a axenda de temas "urxentes" que enviará ao novo responsable do Executivo galego e que a formación nacionalista entende que deben ser tratados "con prioridade"

    O BNG propón incrementar as pensións non contributivas, mellorar a prestación da RISGA e facela compatible co IMV, aumentar as axudas para gastos básicos de vivenda, baixar as peaxes das autoestradas e outorgar axudas directas aos sectores máis afectados pola crise de prezos, mobilizando un total de 700 millóns de euros. Pontón entende que tras tres meses dun goberno “paralizado” en plena crise “non se pode perder nin un minuto máis”.

    “Non podemos dar por normal que haxa lista de espera de até dúas semanas para ir ó médico ou médica de cabeceira, por iso propoñemos un plan de choque de 200 millóns de euros porque o que está en xogo é a saúde”, salientou a líder do BNG, que tamén apuntou que apostar por un modelo público de residencias “sería un paso adiante para que a vellez deixe de ser tratada como negocio e se garanta o dereito a unha vellez digna”.

  • Formoso reclama un Goberno galego "á altura do país", que traballe por "recuperar a Atención Primaria e a protección social dos maiores"

    O secretario xeral do PSdeG, Valentín González Formoso, despois de asistir á toma de posesión de Alfonso Rueda © PSdeG-PSOE

    Despois de asistir á toma de posesión de Alfonso Rueda como novo presidente da Xunta, o líder do PSdeG-PSOE, Valentín Formoso, reclamoulle ao novo máximo responsable do Executivo un Goberno “á altura das circunstancias e á altura do país”. O líder dos socialistas galegos incidiu particularmente na necesidade de "cambiar de modelo económico", apostando por un modelo "baseado na investigación, no talento e no coñecemento”. 

    O líder dos socialistas galegos incidiu na necesidade de "cambiar de modelo económico", apostando por un modelo "baseado na investigación, no talento e no coñecemento”

    Demandou, neste senso, que Rueda afronte o reto de “reter á xuventude galega”, tamén aos mozos e mozas investigadores “para que lle dean soporte ao tecido produtivo, aos tecidos tradicionais da economía galega”.

    Formoso subliñou así mesmo o obxectivo de “recuperar a Atención Primaria de Galicia” e de “outorgarlle aos galegos e ás galegas un dereito que agora mesmo está en tela de xuízo” ogo de 13 anos de recortes polo goberno do PP". De igual xeito, considerou "urxente" incrementar "a protección social dos maiores galegos e 
    galegas”, garantindo “a presenza pública no ámbito do sector da sociedade máis feble e que máis estivo a sufrir a pandemia”.

    Por outra banda, o secretario xeral do PSdeG-PSOE anunciou que desenvolverá unha oposición “traballando, 
    intentando aportar, liderar e esixindo compromiso co país”.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza