Despece

• Lidia Senra: “Temos que loitar pola agricultura e a pesca no noso país"

  “Tanto a política agraria como a política pesqueira común estanse a decidir hoxe en día en Europa condicionadas polos intereses das multinacionais”, lembrou Lidia Senra. Contrapoñendo que dende AGE “queremos unha política pesqueira que salvagarde e potencie a pesca artesanal e o marisqueo, e que lle faga fronte aos intentos da acuicultura intensiva de destruír as nosas costas e recursos do mar”, para que deste xeito “todas as persoas que traballades no mar podades vivir do voso traballo e podades ser quen poña nas nosas mesas os produtos do mar”. Así o asegurou a candidata ao Europarlamento este domingo en Cangas.

  “Tanto a política agraria como a política pesqueira común estanse a decidir hoxe en día en Europa condicionadas polos intereses das multinacionais”, di Lidia Senra

  “Ténsenos que conceder o dereito a pescar e a producir alimentos, e ten que ser repartido de tal xeito que creen postos de traballo, non para beneficiar aos de sempre”, aseverou, “deste xeito moitos mozas e mozos non terían que emigrar, e falariamos dun país cheo de xente, como o foi hai anos”.

  “Ás veces dende as cidades, cando falamos da vida no mar e no agro, da soberanía alimentaria, pódese pensar que estamos falando só das mariñeiras e mariñeiros, dos labregos e labregas, pero non, estamos falando do pobo”, proseguiu.

  AGE di apostar por traballar dende as institucións europeas “polo desenvolvemento de políticas que aposten pola recuperación dos ecosistemas da beiramar, a protección da liña costeira e a fixación de poboación no medio rural e mariñeiro”. Tamén procurará “o establecemento dunha cláusula de salvagarda internacional cando as terras ou as augas dun pobo sexan ameazadas pola especulación e malversación dos cultivos ou recursos pesqueiros”.

  Asemade, a xestión destes recursos pesqueiros debe basearse nun aproveitamento sustentable “que permita asegurar o abastecemento do alimento e as actividades socioeconómicas para as xeracións presentes e futuras”, avogando pola posta en marcha de  plans de xestión dos recursos a longo prazo.

  No mitin celebrado en Cangas do Morrazo Lidia Senra estivo acompañada polo voceiro de AGE no Parlamento Europeo Xosé Manuel Beiras, a vicevoceira Yolanda Díaz e os concelleiros de Alternativa Canguesa de Esquerdas Mariano Abalo e Xosé Manuel Pazos.

  

• Besteiro pide a Feijóo pida desculpas polas palabras machistas de Cañete

  O candidato do PSdeG ás eleccións europeas, José Blanco, defendeu este domingo que "se toda a xente que quere cambio móvese polo cambio, de aquí ao día 25 haberá un cambio sonado, sonado como estaba o outro día Arias Cañete tras o debate con Elena (Valenciano)".

  Nun acto con mozos do PSOE en Compostela, Blanco e o secretario xeral do PSdeG, Gómez Besteiro, coincidiron en cargar contra Cañete. O líder dos socialistas galegos asegurou que lle vai lembrar "todos os días" ao presidente do PPdeG e da Xunta, Núñez Feijóo, que ten que "condenar e pedir desculpas" pola "agresión que supuxo a declaración de Cañete".

  "Pasaron 48 horas e o luns serán 72, desde que Cañete fixo estas impresentables declaracións e, bromas á marxe, non podemos consentir, nin debemos consentir que esas declaracións sigan estando aí sen ser condenadas polo presidente dos galegos2, dixo Besteiro.

  Ademais, Blanco pediu "un esforzo" para que o PP "perda as eleccións tras perder o outro día o debate". Besteiro, pola súa banda, cre que os populares tardaron "tanto" en presentar ao seu candidato porque "era un auténtico impresentable". "É o mesmo que dixo que había que comer iogures caducados ou que dixo que os chuletóns das vacas tolas non facían dano ningún... Agora podemos entender as declaracións posteriores", asegurou.