O pasado mes de xuño o Parlamento galego aprobou o V Plan director da cooperación galega, que prevía que os fondos de cooperación aumentasen cando menos o mesmo que os orzamentos para o 2024. Porén, mentres que as contas públicas medran un 5%, esta partida crece menos do 1%
O pasado mes de xuño o Parlamento galego aprobou o V Plan director da cooperación galega, que debía marcar a estratexia do goberno galego neste ámbito nos seguintes catro anos. O Plan, aprobado previamente polo Consello da Xunta e mais polos axentes de cooperación representados no Consello Galego de Cooperación para o Desenvolvemento, incluía unha previsión de crecemento dos fondos achegados pola Xunta para cooperación que sería igual ou maior que o incremento do orzamento total.
Os orzamentos da Xunta para o ano 2024 prevén un aumento do gasto do 5%, que debería ser, polo tanto, a porcentaxe mínima de incremento dos fondos para axuda ao desenvolvemento. Porén, os primeiros orzamentos aprobados dende a aprobación deste compromiso recollen unha conxelación desta partida (que non chega a subir nin o 1%), o que levou este mércores á Coordinadora Galega de ONGD para o Desenvolvemento a manifestar a súa "preocupación" e a criticar o "incumprimento" do compromiso adquirido polo Goberno galego.
A Coordinadora Galega de ONGD para o Desenvolvemento critica "incumprimento" do compromiso adquirido polo Goberno galego e lembra que "estamos a vivir un dos contextos internacionais máis convulsos e complicados en décadas”
“Non entendemos esta decisión no momento no que as ONGD e as poboacións máis vulnerables do mundo necesitan máis apoio”, di María Paz, presidenta da Coordinadora Galega de ONGD. Paz chama a atención sobre o feito de que "estamos a vivir un dos contextos internacionais máis convulsos e complicados en décadas”, en referencia á guerra de Ucraína, á invasión de Gaza e a outros conflitos bélicos, como o que se vive en Afganistán. Desta tamén as "severas crises migratorias" que se están a producir, con máis de 108 millóns de persoas desprazadas no mundo e as consecuencias do cambio climático.
Así mesmo, advirte da "auxe dos gobernos autoritarios", nomeadamente en Centro América, un dos territorios prioritarios dentro da Cooperación Galega, e da "persecución continua a ONGs e activistas en multitude de países".
“Estes orzamentos supoñen darlle as costas á realidade e á nosa responsabilidade coa xustiza social global”, conclúe María Paz, presidenta da Coordinadora
A entidade explica que cumprir co incremento pactado supoñía unha suba "de apenas 400.000 euros", unha cantidade, prevista, coas que as organizacións xa comezaran a facer os seus plans de traballo para o ano 2024. E critica que a pesar das "reiteradas demandas" da Coordinadora e da oposición dende que se publicou o borrador dos orzamentos, e das propias declaracións do vicepresidente Diego Calvo que asegurou en sede parlamentaria que o orzamento dedicado á cooperación sería “incluso superior ao que estaba comprometido”, finalmente non houbo modificacións. “Estes orzamentos supoñen darlle as costas á realidade e á nosa responsabilidade coa xustiza social global”, conclúe María Paz.
A conxelación dos fondos para cooperación chega despois de anos de lentas pero constantes subas dende o ano 2015, cando se puxo fin aos duros recortes que esta partida experimentara dende a chegada de Núñez Feijóo á Presidencia da Xunta (caeu de 12 a 4 millóns en catro anos)
A conxelación dos fondos para cooperación chega despois de anos de lentas pero constantes subas dende o ano 2015, cando se puxo fin aos duros recortes que esta partida experimentara dende a chegada de Núñez Feijóo á Presidencia da Xunta (caeu de 12 a 4 millóns en catro anos). Cómpre lembrar, neste senso, que o investimento para 2024 está aínda por debaixo do ano no que máis se dedicou á cooperación en Galicia, aquel ano 2009, que contou cun orzamento de 12,2 millóns de euros, fronte aos 9 millóns actuais.
Con todo, é certo que dende o 2015 a cifra si viñera medrando. “O compromiso adquirido pola Xunta era insuficiente pero progresivo”, sinala María Paz. E, por exemplo, durante toda a vixencia do anterior Plan Director da Cooperación Galega no período 2018-2021, e durante o ano 2022 (ano de prórroga) o orzamento para cooperación viña medrando por riba do 11%.
En 2023 a Xunta dedicou 3,35 euros euros por habitante á Cooperación, moi por debaixo da media española (8,42 euros), e aínda máis lonxe dos 23,25 euros por habitante de Euskadi ou os 27,23 de Navarra
Segundo o informe de cooperación descentralizada publicado pola Coordinadora Estatal de ONG, Galicia ocupa o posto 11 no ránking por comunidades autónomas cun investimento do 0,06%, unha cifra moi afastada da media estatal do 0,13%, e aínda máis lonxe do obxectivo do 0,7% que recolle a nova Lei de Cooperación para o Desenvolvemento Sostible e a Solidariedade Global, aprobada no Congreso dos Deputados co apoio de todos os partidos, agás de Vox.
En 2023 a Xunta dedicou 3,35 euros euros por habitante á Cooperación, moi por debaixo da media española (8,42 euros), e aínda máis lonxe dos 23,25 euros por habitante de Euskadi ou os 27,23 de Navarra, as dúas comunidades autónomas máis avanzadas na materia.
