O Goberno galego despraza o trazado ao aparcamento do hospital afastándoo do río e do bosque, e asume outras correccións no parque Eugenio Granell e na contorna da intermodal

"Desde o inicio das obras producíronse diversas protestas e reclamacións polo trazado". Así xustifica a Xunta, admitindo que a presión social dá froitos, a súa rectificación feita oficial este xoves da "estrada para ciclistas", como a denominou ela mesma, que atravesará Santiago conectando Milladoiro con San Caetano pola beira do río Sar. Será unha rectificación parcial, fundamentalmente na contorna do bosque do Banquete de Conxo, onde o Goberno galego admite agora que había "unha mellor opción" considerando "múltiples aspectos como son o cultural, ambiental, funcional, etc".

O carril bici con senda peonil paralela, de cinco ou seis metros de ancho ao longo duns 10 quilómetros por 12 millóns de euros, está xa en obras en case todo o seu trazado agás na zona do Banquete de Conxo. Alí as protestas sociais e do Concello de Santiago levaron a estudar "un trazado alternativo ao contemplado no proxecto construtivo que reduza a afección a esta área", alternativa que este xoves comezou a súa exposición pública. 

Se a idea inicial da Xunta era que, tras afastarse do antigo trazado do tren e xirar cara ao norte o carril bici atravesase o bosque do Banquete de Conxo a carón do río Sar, agora nesa zona despraza lixeiramente o trazado ao leste, facéndoo pasar pola zona máis transformada do aparcamento do hospital de Conxo. Alí a Xunta salienta que reordenará as prazas pero que non rebaixará o seu número. A propia Xunta admite que esta solución "supón unha menor afección á contorna de Conxo e en conxunto é unha mellor opción que a incluída no proxecto construtivo, polo que se propón como novo trazado".

Se o anterior trazado xa tiña pendentes de ata o 7,6%, o novo chegará a un pico de ata o 10,6%

Con este desprazamento "a senda afástase da canle do río Sar, deixando de afectar á zona de fluxo preferente" e "evita o paso polo Bosque do Banquete de Conxo". Se antes había 530 metros do trazado dentro do ámbito do Plan Especial de Protección do mosteiro de Conxo, agora non se entrará para nada nesa contorna. A cambio, se o anterior trazado xa tiña pendentes de ata o 7,6%, o novo chegará a un pico de ata o 10,6%.

O estudo de alternativas da Xunta tamén valorou unha terceira posibilidade que levaría o trazado máis ao norte, por diante do propio mosteiro e igrexa de Conxo, pero descártao porque as pendentes serían superiores e porque ao xuízo dos técnicos a coincidencia de parte do trazado co Camiño de Santiago que entra a Compostela desde o sur provocaría confusión dos usuarios de ambos itinerarios.

No parque Eugenio Granell, onde a obra atravesa zonas verdes en lugar de aproveitar outras sendas preexistentes, demoleranse estas para evitar "duplicidade de percorridos"

Ademais destas mudanzas en Conxo, a senda tamén será rectificada ao seu paso polo parque Eugenio Granell, onde atravesa zonas verdes en lugar de aproveitar beirarrúas ou sendas xa existentes. A opción da Xunta é manter o trazado do seu carril bici e demoler a cambio sendas preexistentes para evitar "duplicidade de percorridos, aumentando a zona verde".

Algo similar farase tamén na contorna da estación intermodal, onde o trazado da Xunta afectaría a hortas urbanas alí existentes e duplicaría sendas peonís previas. 

Mentres, a obra continúa sen mudanzas máis ao norte, ao paso polas brañas do Sar, que atravesa cunha anchura duns seis metros sen aproveitar sendas xa existentes.