O candidato socialista amosa en Malpica o seu apoio ao sector do mar para que avance na súa modernización
O candidato do PSdeG á presidencia da Xunta, José Ramón Gómez Besteiro, defendeu este venres "introducir o peixe dúas ou tres veces por semana nos menús dos comedores escolares e promover campañas que inciten ao consumo de peixe, en xeral, non só porque é un hábito saudable, senón porque contribúe ao mantemento dun sector produtivo moi importante no noso país como é o da frota de cerco”. "O cerco é, ademais, a arte de pesca máis sustentable medioambientalmente pero tamén redunda directamente na economía local do país", engadiu.
Tras reunirse en Malpica coa Asociación de Armadores do Cerco de Galicia (ACERGA) e o seu presidente, Alberto Castro, e o patrón maior e socios da Confraría de Pescadores de Malpica, Besteiro comprometeuse á ampliación do dique de abrigo da localidade, unha longa reivindicación tras varios accidentes marítimos.
Besteiro, que prometeu "sacar a consellería do Mar do actual estancamento", anunciou tamén a posta en marcha de medidas de apoio para a adaptación do sector aos novos procesos, que inclúen a dixitalización total dos controis pesqueiros, e apelou á necesidade de colaboración e traballo conxunto entre administracións e mesmo coa Unión Europea para acadar obxectivos satisfactorios para os intereses galegos. "Rueda non pisou Bruxelas desde que é presidente da Xunta, nós cremos que temos que estar presentes onde están os intereses da nosa xente”, dixo.
Nesa liña, o socialista salientou que a Xunta non executou o 51% do fondo europeo para a Pesca (FEMP), "perdendo unha gran oportunidade para modernizar do sector pesqueiro. Un exemplo claro da mala xestión do PP na Xunta nos últimos dez anos".
Besteiro tamén confirmou a súa presenza na manifestación do domingo en Santiago en defensa do mar ante a crise dos pellets. "Un sector económico con gran peso no noso país e do que viven moitas familias e que temos que defender ante a incompetencia, ocultación, inacción e, sobre todo, as mentiras de Rueda ante a crise da marea branca dos plásticos".
