A finais de 2011 a Xunta autorizou unha obra de dragaxe na ría de Ferrol. Fíxoo a pesar de que un informe dun biólogo da Administración galega consideraba esta actuación de ampliación do calado como "ambientalmente incompatible coa conservación dos hábitats e especies protexidas". Porén, ese informe técnico do Servizo de Conservación da Natureza que desaconsellaba a dragaxe foi "reiteradamente ocultado pola Xunta", segundo denunciou ADEGA dende o primeiro momento.
O informe técnico do Servizo de Conservación da Natureza que desaconsellaba a dragaxe foi "reiteradamente ocultado pola Xunta"
Meses despois a Fiscalía de Medio Ambiente denunciou o sucedido, iniciando unha investigación na que acusa a a Carlos Muñoz, daquela xefe de Servizo de Conservación da Natureza da Coruña, e Rogelio Fernández Díaz, ex-subdirector xeral de Espazos Naturais e Biodiversidade, de falsificar documentos “co único obxectivo de xustificar ante a Fiscalía a non incorporación á Declaración de Impacto Ambiental do informe que debería ter emitido a Dirección Xeral da Natureza” e así poder levar a cabo a dragaxe.
O xuízo contra Muñoz e Fernández terá lugar este xoves e venres na sección sexta da Audiencia Provincial da Coruña, con sede en Compostela. A Fiscalía pide para cada un deles seis anos de cadea e o mesmo período de inhabilitación para o exercicio de calquera función ou emprego público por un delito continuado de falsidade de documentos públicos.
A Fiscalía pide para cada un deles seis anos de cadea e o mesmo período de inhabilitación para o exercicio de calquera función ou emprego público
O Ministerio de Medio Ambiente aprobou a declaración de impacto sen o informe de Conservación da Natureza que era obrigatorio por lei e que neste caso era negativo. Coa dragaxe xa finalizada, apareceu o informe que recomendaba a non execución do proxecto polo impacto ambiental que podía supoñer.
O informe ocultado pola Xunta consideraba a dragaxe "ambientalmente incompatible coa conservación dos hábitats e especies presentes" nunha área (LIC Costa Ártabra) parte da Rede Natura 2000. E, polo tanto, a a declaración de impacto ambiental finalmente aprobada minimizaba ou oculta os efectos negativos de determinados impactos, e sobre todo os efectos sobre determinadas especies protexidas. Deste xeito, os riscos das agullas de rocha que obstaculizan a entrada de barcos de gran calado como os gaseiros de Reganosa desapareceron, sen ter en conta así as alegacións de ecoloxistas e mariscadores.
O escrito de acusación da Fiscalía detalla as sucesivas falsificacións levadas a cabo polos dous funcionarios para "ocultar a existencia dun informe negativo á obra e disimular ou xustificar así esa omisión no seu departamento". Entre as manobras figuran a inclusión no expediente de documentos inexistentes, simulación doutros e cambios de data "para reforzar la aparencia de autenticidade" e "mostrar o seu celo na tramitación do expediente", sinala a Fiscalía.
O escrito de acusación da Fiscalía detalla as sucesivas falsificacións levadas a cabo polos dous funcionarios
No ano 2016 Carlos Muñoz e Rogelio Fernández Díaz foron xa investigados xunto co ex director xeral da Natureza, Ricardo García-Borregón, e Javier Turrillo Montiel, ex xefe do Servizo de Análise e Proxectos da Consellería naquela altura. García-Borregón, que estivera implicado en moitas máis polémicas, fora cesado do seu posto como director xeral de Conservación da Natureza en agosto de 2013. O resto de implicados no caso do dragado da ría de Ferrol tamén foran destituídos dos seus postos ou cambiados de departamento por diferentes motivos.
Xa daquela ADEGA consideraba "irrefutable e irrebatible" que o informe que autorizou a dragaxe foi realizado a posteriori para xustificar aquela actuación. A asociación ecoloxista criticaba a "escandalosa inacción, cando non a defensa de intereses alleos á conservación" por parte dos responsables do departamento, que se exemplificaría "na tolerancia ou promoción de actuacións incompatíbeis coa protección do noso patrimonio natural".
