Tras anos de axudas por parte da Xunta o presidente galego salienta que é unha “entidade privada” e obvia o futuro do patrimonio cultural
“Teño a palabra do presidente Lacalle e fíome”. Así amosou este venres o presidente Feijóo a súa confianza en que a intervención por parte do goberno de centro dereita de Uruguai da mutualidade sanitaria Casa de Galicia de Montevideo anunciada o mércores será temporal, dun máximo dun ano segundo o Ministerio de Saúde Pública uruguaio. A institución, creada pola emigración galega, acumula anos de perdas e débedas.
![](https://praza.gal/storage/uploads/lacalle-2025d4b.jpeg)
Este venres Feijóo foi preguntado polo seu posible coñecemento previo do agora ocorrido coa Casa de Galicia e sobre se a Xunta prevé algún tipo de contacto para protexer as pezas de valor patrimonial que poidan verse afectadas. A resposta do presidente comezou asegurando que este tipo de entidades creadas pola emigración galega “forman parte dos intereses e as preocupacións da Xunta”, pero engadiu a continuación que son “entidades privadas”. “Somos conscientes da importancia que ten este centro para a colectividade galega”, dixo, xa que “é un dos mellores hospitais de Montevideo e Uruguai”.
“Somos conscientes da importancia que ten este centro para a colectividade galega”, di Feijóo, xa que “é un dos mellores hospitais de Montevideo e Uruguai”
Feijóo lembrou que “non é a primeira vez que se intervén” a institución e dixo que “se os hospitais galegos tivesen a personalidade xurídica que ten Casa de Galicia moitas veces teríamos que intervilos porque as súas desviacións son constantes, non se interveñen porque son públicos”. Nesa liña, asegurou que o Goberno de Uruguai valorou dúas posibilidades, a “fusión con outras entidades ou hospitais” ou a intervención temporal para o saneamento e “posterior vida autónoma”. “Agradezo que optase pola segunda”, dixo Feijóo, que subscribiu “as palabras do presidente Lacalle de que Casa de Galicia ten que seguir sendo Casa de Galicia”.
![](https://praza.gal/storage/uploads/cama-6e92c7a.jpeg)
Na súa resposta, nada dixo Feijóo sobre se pode ou non haber patrimonio histórico e cultural vinculado á emigración galega que se poida ver afectado nin sobre as axudas pasadas ou novas axudas futuras que a Xunta poida destinar á Casa de Galicia.