A líder do BNG e o presidente fan confrontar a conxelación da política de vivenda pública en década e media cos actuais plans nos que o Goberno galego cifra en case 3.000 os pisos en marcha
O Rexistro de Demandantes de Vivenda Protexida da Xunta achégase ás 23.000 solicitudes pendentes, un récord. Nos últimos meses esas peticións véñense disparando -ata un 30% na Galicia urbana en menos dun ano- en paralelo aos anuncios de nova vivenda pública por parte do Goberno galego, que nun informe recente cifra en 2.943 os pisos que ten "en diferentes fases de tramitación e execución". Unha suma practicamente equivalente ao total de vivendas protexidas entregadas no noso país -tanto de promoción pública como privada- nos últimos quince anos.
Esas dúas realidades, a da práctica paralización da política pública de vivenda durante as lexislaturas de Alberto Núñez Feijóo na presidencia -nos peores anos da gran recesión, pero tamén nos posteriores- e os plans actualmente en marcha foron confrontadas este mércores na sesión de control ao presidente da Xunta. Alfonso Rueda esgrime a fin desa parálise ante Ana Pontón, que atendendo aos datos oficiais no que vai de lexislatura ve como un "engano" a posibilidade de chegar, como promete o Goberno, á fin da lexislatura en 2028 con "4.000 novas vivendas de promoción pública". "Non xogue coas ilusións da xente", esixe.
"Sabe que en 2028 non vai haber construídas 4.000 novas vivendas, fixeron da mentira a súa forma de Goberno", reprochou a portavoz nacional do BNG. "Eu anuncieinas, efectivamente, e me di un ano despois que onde están? En construción", retrucou Rueda, quen augura que a Pontón a "vai amolar que estean construídas" mesmo "en concellos do BNG que están colaborando" con cesións de terreos. "Xa o ano que vén vouna convidar cando entreguemos as primeiras en Pontevedra, a ver se vén", reta.
"Non vai haber 4.000 novas vivendas en tres anos", mantén Pontón. "Están construíndose", reitera Rueda
"Non levan dous anos gobernando, levan 16 dinamitando a política social de vivenda e por iso estamos como estamos", replicou Pontón, disposta a atender o "convite" presidencial non só a Pontevedra, senón "a cada unha desas construcións". "Non vai haber 4.000 novas vivendas en tres anos, porque xa case leva media lexislatura" e no que vai de 2025 "fixéronse 47" pisos de promoción pública, advirte en referencia aos datos oficiais do Ministerio de Vivenda para Galicia.
"Están construíndose", reitera o presidente, que insta a Pontón a ter en conta que "hai unha cousa que se chama facer unha obra". "Vostede cre que a política é máxica porque en tantos anos na oposición, esas cousas se poden chegar a pensar", mantén nun contexto no que a líder soberanista lle reclama que "sexa serio", "non xogue coas ilusións" das persoas anotadas no Rexistro de Demandantes de Vivenda e asuma o plan que propón o Bloque para mercar vivendas xa construídas e destinalas a alugueiro: "En cinco anos, 4.000 vivendas", reclama.
O que din os datos
Os datos citados por Pontón na sesión de control son os da base oficial do Ministerio de Vivenda e os devanditos 47 pisos son o que, de xaneiro a xuño deste ano -ata onde chega a estatística polo momento-, recibiron cualificación definitiva como vivenda protexida de promoción pública en Galicia. Unidos a tres de promoción privada, dan unha suma total de 50.
No primeiro semestre de 2025 quedaron rematadas 50 vivendas protexidas en Galicia e iniciáronse 314, a maioría de promoción pública
Nese primeiro semestre de 2025 a mesma estatística oficial reflicte 314 cualificacións provisionais de vivendas protexidas en territorio galego, isto é, algo máis de trescentos pisos protexidos iniciados ata a metade do ano. A maioría, 217, eran de promoción pública, e os restantes 97 de promoción privada.
Mesmo cos datos da metade do ano, o número de vivendas protexidas iniciadas en Galicia sería o máis alto dende 2020. Previsiblemente, finalizará o exercicio coa cifra máis avultada en década e media: a Consellería de Vivenda reitera que as que está a tramitar roldan xa as 3.000. Seguirá, non obstante, lonxe dos números do Goberno de coalición de PSdeG e BNG e das lexislaturas de Fraga, cando se chegaron a superar as 4.000 vivendas protexidas iniciadas non nunha lexislatura, senón nun só ano.
