Despece

• Rajoy, 'de bares' pola montaña luguesa sen Feijóo

  Como en 2009, o PP decidiu duplicar a súa campaña: por unha banda Feijóo e pola outra, Mariano Rajoy, aínda que desta volta coa salvidade de que a presenza do actual presidente do Goberno central non é especialmente cómoda para o aspirante á reelección na Xunta. Así, mentres o candidato se daba un baño de multitudes na Coruña Rajoy percorreu varias vilas da provincia de Lugo a comezar por Guitiriz, onde o inicialmente previsto paseo polo centro da localidade foi reemprazado por un acto nun balneario próximo para así evitar posibles protestas ou mostras de rexeitamento.

  Tras o lixeiro contratempo de Guitiriz o xefe do Goberno de España trasladouse á montaña, nun periplo que incluíu, entre outros actos o paso por un bar en Baralla e un mitin nas Nogais, nun deses actos onde o líder conservador se amosa máis relaxado que antes os focos madrileños e os dirixentes locais, especialmente locuaces. Así, o acto comezaba co parlamento do alcalde das Nogais, Jesús Núñez, Rucho, que se afanou en describir un case apocalíptico panorama correspondente ao mandato do bipartito "social-nacionalista" entre 2005 e 2009: "despilfarro e corrupción por todas partes", advertiu o rexedor para instar a veciñanza a votar o 21 de outubro; "todas as enquisas que vedes non son reais", advirte.

  Rajoy describe as súas experiencias viaxando de 'Piedrafita' a 'Villagarcía de Arosa'

  Tras Rucho foi a quenda do secretario do partido na provincia, José Manuel Balseiro, orgullosos de terlle "fastidiado tres alcaldías ao PSOE" na zona nas pasadas municipais e, a continuación, para o presidente provincial e voceiro no Senado, José Manuel Barreiro, que ante o riso de Rajoy ofreceu unha particular descrición das demais forzas políticas, como "o Bloque tradicional", "o Bloque de Beiras", ou "a señora á que non lle gusta que lle chamen comunista", en referencia á número dous de Alternativa Galega de Esquerda e líder de Esquerda Unida, Yolanda Díaz.

  Neste ambiente foi no que interveu Rajoy, que combinou a chamada ao voto para o ausente Alberto Núñez Feijóo coa lembranza da súa mocidade, cando estudaba en León e, para ir "a Villagarcía de Arosa" tiña "que facer noite en Lugo" polo mal estado da estrada en lugares como "Piedrafita", onde "se un atopaba un camión, tiña que ir en primeira". Anécdotas automobilísticas á marxe Rajoy enfatizou a importancia do rural galego e a súa evolución lembrando, como xa fixera no seu debate das xerais ante Alfredo Pérez Rubalcaba, que "eu inaugurei a luz eléctrica, eu, a principios dos 80 nalgunhas parroquias" de Pontevedra, onde presidía a deputación. Neste contexto, Rajoy conclúe: "En España sobra espectáculo, sobra esaxeración e radicalismo, no fondo e nas formas" e por iso "o que fai falta é o que sempre achegou Galicia: moderación e sensatez". E nesa Galicai "Feijóo merece a confianza outra vez dos galegos" porque vai sair da crise dos primeiros e senón, ao tempo", vaticina.