Tras as municipais de maio os socialistas revalidaron o control da asemblea de concellos e provincias, que ata agora encabezaba o rexedor do Barco de Valdeorras, Alfredo García
O alcalde socialista de Vilagarcía de Arousa, Alberto Varela, foi elixido este venres novo presidente da Federación Galega de Municipios e Provincias (Fegamp) na asemblea desa institución obrigada tras as eleccións municipais do pasado maio. Os resultados daqueles comicios déronlle novamente ao PSdeG o dereito a ostentar a presidencia da Fegamp, que ata agora ocupaba o tamén socialista Alfredo García, rexedor do Barco de Valdeorras. O vicepresidente primeiro será o popular Alfonso Villares, alcalde de Cervo; o vicepresidente segundo o rexedor de San Sadurniño, Secundino García; e a vicepresidenta executiva a socialista María Barral, alcaldesa de Betanzos.
No acto de toma de posesión Varela apelou a que os concellos non sexan os responsables finais ante a cidadanía de exercer competencias que outras administracións abandonan. En presencia do presidente da Xunta, Alberto Núñez Feijóo, o socialista tamén reclamou que a concesión de axudas aos concellos por parte doutras administracións sexa ecuánime. Unha petición que chega despois de anos de denuncias contra administracións gobernadas polo PP que priman nesas axudas a concellos dese mesmo partido ou que xestionan esas subvencións con escurantismo.
Feijóo reclamou dos concellos “cooperación intelixente” e “lealdade intrainstitucional”
Pola súa banda, Feijóo reclamou dos concellos “cooperación intelixente” e “lealdade intrainstitucional” e, nun acto no que os concellos reclamaban maior financiamento local, aproveitou para volver reprochar ao Goberno central que non transfira á Xunta os cartos pendentes. Tamén lanzou mensaxes en clave partidista arredor da negociación para conformar o Goberno central: “A inestabilidade ten consecuencias e tamén as tería unha política hipotecada por privilexios territoriais que esquecera a igualdade que os españois teñen constitucionalmente recoñecida”, dixo.
