O Bloque remite un documento ao Ministerio para a Transición Ecolóxica no que lle pide declarar "non apto" o litoral galego para a eólica mariña
O BNG vén de remitir un documento ao Ministerio para a Transición Ecolóxica e o Reto Demográfico un documento no que propón declarar o litoral galego como espazo "non apto" para a instalación de parques eólicos mariños.
O escrito é a reacción á consulta pública, por parte do Ministerio, sobre a avaliación ambiental dos Plans de Ordenación do Espazo Marítimo (POEM) para regular a instalación destes parques na costa galega.
Segundo o comunicado emitido polo BNG, ao seu ver a implantación da eólica mariña é "incompatible" coa actividade pesqueira, un sector que lembra que é "clave" desde o punto de vista económico e medioambiental.
A portavoz parlamentaria de Pesca do BNG no Parlamento, Rosana Pérez, destaca que a pesca produce beneficios para todo o país e "non só para catro grandes emrpesas", ademais de xerar emprego "tanto directo como indirecto".
“Nun momento en que a propaganda das multinacionais e dos gobernos está empeñada en convencernos de que a eólica mariña é a salvación de todos os nosos males, temos que poñer en valor o sector pesqueiro que é punteiro desde o punto de vista económico e do medio ambiente e que produce beneficios para todo un Pais e non só para catro grandes empresas”, asegura a deputada de Ribeira.
O BNG esixe á Xunta que "exerza as súas competencias" e "encabece" a defensa do sector pesqueiro e mariñeiro
Ademais, o Bloque esixe á Xunta que "exerza as súas competencias" e "encabece" a defensa do sector pesqueiro e mariñeiro para que as "grandes eléctricas" non "acaben con todo". No documento remitido ao Ministerio de Transición Ecolóxica, o BNG tamén advirte da "perigosidade" da maior concentración do tráfico marítimo comercial que se produciría por mor da instalación dos parques, cunha afectación ao "marisqueo de a pé e a flote".
“A posibilidade de incluír plataformas físicas ou áreas eólicas, que poidan modificar e concentrar aínda máis o tráfico marítimo comercial e pesqueiro fronte ao litoral de Galiza, influiría negativamente nos xa alarmantes parámetros de seguridade marítima”, explica o BNG.
Alén disto, a formación nacionalista destaca as competencias que Galicia ten sobre toda a súa costa, na que calquera instalación requeriría da autorización por parte da Xunta.
