Franciso Conde salienta “a aposta da Xunta por unha Galicia máis innovadora, máis preparada e máis verde” nun acto incluído na súa axenda oficial organizado por unha entidade que se declara continuadora de FAES
Hai un ano o PP creou a Fundación Concordia y Libertad como herdeira doutras fundacións previas ligadas ao partido como a FAES de José María Aznar. Este luns esa nova fundación organizou nun hotel de Santiago un foro denominado Industria 4.0: cara a unha industrialización inclusiva, sustentable e innovadora, evento ao que asistiu o conselleiro de Economía, Francisco Conde, dentro da súa axenda oficial da xornada. Alí Conde, segundo divulgou o seu departamento malia estar en campaña electoral, gabou “a aposta da Xunta por unha Galicia máis innovadora, máis preparada e máis verde, que compatibilice a sustentabilidade ambiental co desenvolvemento industrial”, traballo que contrapuxo a un suposto rexeitamento do Goberno central socialista dunha “transición xusta e que non xere desemprego”.
![](https://praza.gal/storage/uploads/foto2-e30e841.jpeg)
A Fundación Concordia y Libertad preséntase como un lugar “onde o centro dereita liberal conservador teña o seu sitio” e na que teñan cabida “os estudos económicos que abandeirou FAES”
Segundo salientou o propio PP hai un ano, a Fundación Concordia y Libertad pretende ser un lugar “onde o centro dereita liberal conservador teña o seu sitio” e na que teñan cabida “os estudos económicos que abandeirou FAES”. O foro que celebrou este luns en Santiago foi inaugurado polo presidente da fundación, o deputado popular Adolfo Suárez Illana, e clausurado por Francisco Conde como conselleiro de economía, segundo se reflectiu na axenda oficial da Xunta e divulgou o Goberno galego nun comunicado de prensa.
Nesa nota de prensa, a Consellería de Economía fixo fincapé no “apoio á industria electrointensiva, e a industria en xeral”, dúas cuestións nas que o PPdeG e a Xunta están a centrar os seus ataques aos socialistas. A nota tamén gaba “o esforzo que fai Galicia para xerar confianza, cuns orzamentos en tempo e forma, ou sendo a comunidade que antes paga aos seus provedores”.
Estes eloxios a políticas do Goberno galego prodúcense despois de que a Xunta Electoral ordenase á Xunta retirar varias campañas propagandísticas nas que se divulgaban supostos logros do Executivo de Feijóo que se consideraron que podían interferir na campaña electoral. Iso non impediu que a Xunta divulgase o pasado xoves un inédito informe coas súas "demandas ao próximo Goberno de España".
![](https://praza.gal/storage/uploads/mato-a6d9799.jpeg)
No foro deste luns participaron diversos cargos populares
No foro deste luns participaron entre outros, segundo se encargou de divulgar a portavoz do PP no Concello da Coruña, Beatriz Mato, cargos populares como a deputada Tristana Moraleja ou o senador Miguel Lorenzo. A actividade recibiu financiamento do Ministerio de Asuntos Exteriores, departamento público que nos últimos anos xa concedera achegas á Fundación Humanismo y Democracia, da que Concordia y Libertad é herdeira, a través da súa liña de subvencións a fundacións e asociacións vinculadas a partidos políticos.