Despece

• Administración autonómica: o recorte que vén

  Os epígrafes do programa electoral do PP dedicados á función pública e á xestión do persoal ao servizo da Administración autonómica permiten tirar, malia á súa ambigüidade, a intención dos populares de volver meter a tesoira neste ámbito. Así, aseguran que porán en marcha un "pacto pola sustentabilidade do sector público galego" no que, sen concretar con quen será pactado, anuncian que reformularán a "política de recursos humanos" para facelos "axeitados ás necesidades reais" e corrixir as súas "disfuncións". 

  Nun contexto no que a formación conservadora consolidará a estruturación da Administración paralela a través dun sistema de axencias propóñense aprobar no Parlamento a lei do Estatuto Galego do Empregado Público, que se acompañará cunha "nova normativa de selección de persoal" na que os sindicatos terán menos peso xa que, por exemplo, se reducirá a súa capacidade de intervención ao organizar as relacións de postos de traballo dos diferentes departamentos. Ademais, anuncian, esta será a lexislatura na que comecen a funcionar os "concursos de traslados abreviados", para facer que a mobilidade do persoal entre áreas administrativas sexa máis rápida, e a "avaliación individual" do funcionariado e do persoal contratado, "e non das unidades administrativas" no seu conxunto.

  

• Volve a promesa de garantir por lei os tempos de espera

  Se ao longo da campaña electoral houbo algún tema practicamente omnipresente ese foi o futuro da sanidade pública, en "perigo" polos recortes, segundo os grupos que formarán a oposición, e "blindada" a xuízo do PP. Neste ámbito, os conservadores proclaman que a "eficiencia" será a súa principal máxima ao tempo que recuperan algunhas das promesas que xa foran estrelas programáticas da formación en 2009 e que, polo momento, non viron a luz. Este é o caso, por exemplo, da Lei de Garantías, para establecer tempos máximos de espera para a asistencia sanitaria -por exemplo, 45 días para consultas e probas-. Esta norma, que Alberto Núñez Feijóo asegurou non poder desenvolver a causa da falta de financiamento do Goberno de Zapatero, é anunciada de novo polo PP para o novo mandato.

  Sen saír do ámbito social e sanitario o programa do PP combina algunhas medidas xa en marcha con outras de nova aplicación. Así, por exemplo, aseguran ter "garantida" a asistencia sanitaria ás persoas inmigrantes que non son aseguradas do Sergas -poden acudir aos servizos sanitarios, aínda que con notables restricións- e comprométense a aplicar medidas que "retrasen o maior tempo posible" a "utilización de recursos" do sistema de atención á dependencia por parte da poboación anciá. Neste sentido, aseguran, chegarán a 2016 con "2.500 prazas" máis de residencias de maiores.

  

• De Pemex ao emprego para xornalistas

  A linguaxe e as propostas económicas impregnan case todos os epígrafes do programa do PP dende o inicio, onde o partido asegura que continuará a desenvolver dende o Goberno o Plan Estratéxico da economía galega aprobado na pasada lexislatura e que, neste caso, terá a creación de emprego como "prioridade", din. Neste ámbito colle un amplo abano de propostas entre as que se mesturan algunhas que quedaron no caixón de 2009 a 2012 -como a "psoibilidade de introducir novos beneficios fiscais nos tributos autonómicos"- con outras novas, como a aprobación dunha nova Lei de Réxime Financeiro.

  Coa vontade xenérica de "consolidar unha entidade financeira galega" como pano de fondo o programa económico do PP reproduce tamén iniciativas do propio partido a nivel de Estado, como a elaboración dunha Lei de Emprendemento que procure, entre outros aspectos, un "cambio de mentalidade" da cidadanía cara ás persoas que inician un novo negocio. Neste sentido, anuncian, propóñense a "difusión de casos de éxito de mozos emprendedores" mediante a celebración de "xornadas" por todo o país. 

  Sen saír da economía o PP mantén que lle dará un novo pulo a Galicia Calidade -empregada no mandato que vén de rematar para promocionar o conxunto da Xunta e non só os produtos galegos- a través da posta en marcha dunha "rede de franquías" da propia marca, medida á que se engadirá, anuncián, a creación de novas indicacións protexidas de produtos propios como Pan Galego/Pan Gallego. Xunto a todo isto inclúe o PP de novo un dos leitmotivs da campaña, a petroleira mexicana Pemex, coa que aseguran que continuarán a "negociar" investimentos en estaleiros galegos.

  Nesta área programática figura tamén unha proposta xa clásica en cada inicio de mandato en Galicia: o "proxecto de regulación dun marco estable de axudas" aos medios de comunicación, se ben neste caso o PP combínao coa promesa dun "plan de formación" para xornalistas e a procura de oportunidades laborais específicas para o sector da comunicación, dado o impacto que a crise está a ter nel, abondan. Do mesmo xeito, reiteran, aprobarán a Lei de Publicidade Institucional -anunciada con existencia ao longo da pasada lexislatura-.

  

• O eterno debate aeroportuario e as vilas "bonitas"

  Unha vez máis o partido gobernante inicia a lexislatura asegurando que, desta volta si, aprobará un "plan de transporte aéreo" para harmonizar a actividade dos tres aeroportos galegos. Non obstante, dada a ausencia de competencias propias e de consenso entre os concellos da Coruña, Vigo e Santiago, semella que as intención da Xunta para os aeródromos só poderán concretarse noutro ámbito, a da Lei de Instalacións Aéreas que o PP promete para regular heliportos, bases aéreas de emerxencias e equipamentos semellantes.

  Relacionado cos aeroportos está o turismo, de novo presentado polos populares como estratéxico e ligado á chegada do AVE -a Madrid en 2018, o eixo atlántico en 2014, prometen-. Entre as novas propostas salientan algunhas como a busca de "razóns" para visitar Santiago aínda que non sexa ano de Xacobeo -propoñen, por exemplo, que unha destas "razóns" sexa Francisco de Asís, en 2013 e 2014- ou a procura de destinos "máis bonitos" a través dun "concurso entre vilas galegas para potenciar" o seu "embelecemento". Ademais, aseguran, farán "compatibles" as actividades "loxísticas" da pesca e do marisqueo coa instalación de portos deportivos.

  

• Poñer a funcionar o contador dos traspasos e medios en galego

  Un dos ámbitos nos que o primeiro goberno de Alberto Núñez Feijóo tivo máis resposta social foi o da identidade galega pola vía da lingua e, xa no Parlamento, a da parálise no proceso de ampliación do autogoberno, dado que rematou o seu mandato sen sumar unha soa competencia nova. Neste sentido o programa do PP inclúe o compromiso de "continuar negociando" as transferencias prometidas e non logradas ao longo da oitava lexislatura. Isto acontecerá nun Parlamento recortado pero no que os populares introducirán a "institucionalización da figura do xefe da oposición", especialmente comprometida nunha Cámara coa esquerda dividida en tres grupos. 

  Na área lingüística malia ao acontecido dende 2009 os populares manteñen que desenvolverán o Plan Xeral de Normalización da Lingua Galega, aprobado en 2004 por unanimidade e que inclúe preceptos contrarios a normas como o decreto do plurilingüismo, caso por exemplo de garantir que, cando menos, o 50% das materias escolares se imparten en galego. Ademais, din, no ensino porase en marcha un "sistema de indicación da lingua materna" para definir o idioma no que se imparten os primeiros niveis educativos e que tamén terá a opción de "bilingüe". Do mesmo xeito, anuncian, "seguiremos apoiando a edición e publicación de medios en galego", tamén en "soporte dixital".