Os colexios de enfermaría tamén rexeitan o "frívolo e partidista" cheque de Feijóo para gastaren na hostalería

Mobilización de enfermeiras dun hospital galego, nunha imaxe de arquivo CC-BY-NC-SA CIG

Hemeroteca

O bono de ata 250 euros anunciado a pasada semana por Alberto Núñez Feijóo para que persoal sanitario e de servizos sociais que traballou fronte ao coronavirus faga gasto en locais turísticos e hostaleiros segue colleitando críticas entre o sector. O anuncio, lanzado a unha semana do inicio da campaña das eleccións galegas do 12 de xullo, propiciou críticas da actual oposición e de profesionais a título individual, pero tamén tamén o rexeitamento formal de boa parte das organizacións máis representativas do sector, dende os colexios médicos ata os de enfermaría.

"Rexeitamos esta iniciativa populista e electoralista", din os catro colexios de Enfermaría, que subliñan que a crise da covid-19 "fixo patentes" as "deficiencias" que as profesionais do Sergas viñan sinalando

Pouco despois de que o Consello Galego de Colexios Médicos -que agrupa as catro entidades colexiais galegas- reclamase "dignidade, non frivolidade" para expresar o seu "máis rotundo rexeitamento" a este tipo de compensacións para o persoal sanitario que afrontou a crise da covid-19, os colexios galegos de Enfermaría veñen de pronunciarse nun sentido moi semellante. Os catro colexios oficiais tamén rexeitan o bono de Feijóo por "frívolo" e "partidista".

"Rexeitamos esta iniciativa populista e electoralista. Somos profesionais da saúde que defendemos o sistema sanitario público e universal", explican nun comunicado conxunto tras unha crise sanitaria que fixo "patentes" as "deficiencias" no Sergas, que "non serán esquecidas por recibir este premio". "Somos conscientes das necesarias medidas que reactiven o comercio e o turismo, pero esta medida partidista non é a forma de facelo".

O persoal de enfermaría asumiu gran parte do dispositivo do Sergas fronte ao coronavirus -na imaxe, recollida de mostrar para test da covid-19 en Ourense- CC-BY-SA Sergas

Ben ao contrario, cren, se algo está a deixar claro o coronavirus é que no sistema sanitario público hai "problemas urxentes que hai que afrontar mediante un incremento do investimento", atendendo "a mellorar a precariedade laboral" ou a rebaixar o "alto grao de eventualidade". Todas elas, subliñan, son "reivindicacións históricas que non se poden agachar por tras dun bono".

"A precariedade, a eventualidade e as reivindicacións do persoal sanitario non se poden ocultar por tras dun bono; moitas enfermeiras buscan traballo fóra e iso non vai deixar de suceder por que a Xunta nos convide a ir de vacacións"

"Galicia é unha das comunidades con menos enfermeiras por habitante", subliñan os colexios profesionais, e "o mellor premio ás enfermeiras, pero tamén ao conxunto da cidadanía", sería "reducir o número de eventuais, dignificar salarios, reforzar o persoal en Atención Primaria e centros sociosanitarios, facer acopio de equipos de protección e outros materiais" ou que o persoal non se reduza. "A precariedade laboral, a alta eventualidade e as reivindicacións do persoal sanitario non se poden ocultar por tras dun bono, moitas enfermeiras e matronas buscan traballo noutras comunidades autónomas ou no estranxeiro e iso non vai deixar de suceder porque a Xunta nos convide a ir de vacacións", conclúen.

"É un insulto ao persoal"

Na liña dos colexios médicos e de enfermaría e de plataformas como as Enfermeiras Eventuais en Loita, que afirman alegrarse de que outros colectivos "se sumen" ao rexeitamento das "migallas" coas que elas confrontan dende o inicio da súa reivindicación, pronúnciase tamén a Asociación Galega para a Defensa da Sanidade Pública (AGDSP). Para este colectivo de profesionais do Sergas, o bono de Feijóo é directamente "un insulto".

Manifestación de SOS Sanidade Pública, o pasado febreiro en Santiago CC-BY-NC-SA CIG

"Considerámolo unha paga miserable", di a Asociación Galega para a Defensa da Sanidade Pública

"Novamente, o PP pretende trasladar ao persoal do Sergas a súa casposa estratexia electoral de comprar a vontade dos colectivos sociais á conta do erario", se ben nesta ocasión a intención deriva "nun insulto" por pretender "convidar a tomar unhas cañas ou a unha habitación de hotel" para compensar "os esforzos para tratar a poboación durante a pandemia". "Considerámolo unha paga miserable para un colectivo que tivo que traballar en moitas ocasións sen o equipamento necesario para garantir a súa seguridade ou sufrir atrasos na realización das probas para a detección do virus".

"Esta propina -consideran- de claro signo electoral realízaa un señor que anunciou publicamente, en plena pandemia, a súa intención de recortar o soldo ao persoal do sistema sanitario público", acusan. Por iso, conclúen, rexeitan a medida e esixen "que se revertan os recortes sanitarios, que remate a precariedade laboral e se fagan oposicións para todas as prazas vacantes no Sergas".

Despece

  • O Colexio de Traballo Social tamén rexeita o bono de Feijóo por "ética" mentres a patronal turística o aplaude por "idóneo"

    Xunta de Goberno do COTSG © COTSG

    Despois de que os catro colexios médicos de Galicia, os catro colexios de enfermaría e os sindicatos e plataformas máis representativos da sanidade rexeitasen unanimemente o bono anunciado por Feijóo para que este persoal gaste ata 250 euros en locais hostaleiros como compensación polo traballo fronte ao coronavirus, o Colexio Oficial de Traballo Social pronunciouse nun sentido semellante. Como o persoal sanitario, o COTSG tamén desbota que os seus membros acepten o ofrecemento e fano, din, por "ética".

    "O que sería todo un recoñecemento serían contratos estables e reforzar os servizos sociais para a crise, que non fixo máis que comezar", sinala o COTSG

    "O código deontolóxico e a nosa ética impídennos aceptar esa extraña compensación por facer o noso traballo", resumen, ademais de lanzar unha mensaxe ao actual presidente da Xunta. "O que si sería todo un recoñecemento" para esta profesión "sería que, dende a Administración autonómica, se cumprisen as ratios de referencia na dotación de persoal para os servizos sociais", así como "contratos estables e un reforzamento do sistema para a crise, que non fixo máis que comezar".

    Román Rodríguez, este 22 de xuño con representantes do Clúster do Turismo © Clúster Turismo de Galicia

    Aplauso do Clúster do Turismo

    A patronal turística eloxia á Xunta polo bono, que "permite favorecer o consumo interno"

    Mentres medran as críticas no colectivo que a Xunta elixiu como destinatario do bono, representantes de parte das empresas que se beneficiarían del, as agrupadas no Clúster do Turismo de Galicia, apláudeno como "idóneo". Nun encontro co conselleiro Román Rodríguez, representantes destas compañías definiron a medida como "esencial" porque "permite favorecer o consumo interno", en verbas de Cesáreo Pardal, presidente da entidade.

    Segundo Pardal, o controvertido bono fora "demandado polo conxunto do sector como unha ferramenta de reactivación" e "como tal se incluíu no plan de reactivación presentado pola Xunta e desenvolvido en cooperación co sector turístico galego". A tarxeta, agrega, "segue a estela de iniciativas similares doutras comunidades e doutros países co obxectivo de incentivar o consumo propio e animar o turismo nacional".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza