O portavoz socialista teme que o popular “vaia converterse nun presidente tutelado, irrelevante”, e recibe como resposta que actúa con “sucursalismo” do PSOE estatal
O presidente da Xunta, Alfonso Rueda, e o portavoz parlamentario do PSdeG, Luis Álvarez, intercambiaron este mércores, na primeira sesión de control ao primeiro no Parlamento, cifras positivas ou negativas sobre a situación en Galicia de diversos sectores. Foi un debate no que o contido de fondo, nada novidoso, quedou eclipsado polas formas, cos dous protagonistas intercambiándose chamamentos ao diálogo pero seguidos de reproches mutuos, e coa bancada do PPdeG aplaudindo ao seu líder de forma prolongada como ocorre nas grandes ocasións ou nas grandes intervencións malia que a sesión deste mércores non pase á historia.
Ante os reproches de Álvarez a Rueda sobre todo tipo de eivas na situación actual de Galicia, o presidente respondeulle afeando que os socialistas non lle dean “nin cen días, nin cen horas, nin cen minutos”. “Empezamos hai dez días”, dixo o presidente, quen admitiu que “claro que no debate de investidura non puiden falar de todo aquelo que estamos facendo”.
Na súa segunda intervención Álvarez replicou a Rueda que “aprendeu ben do seu xefe a botar balóns fóra” e amosou o seu temor de que “vaia converterse nun presidente tutelado, irrelevante”. “Traballen, que levamos tres meses cun Goberno da Xunta de brazos caídos desde que a señora Díaz Ayuso decidiu que Galicia tiña que cambiar de presidente”, dixo o socialista.
Rueda pechou o debate afeando ao socialista as súas “descualificacións que case rozan o persoal” e acusou ao PSdeG de “sucursalismo” do PSOE estatal.
![](https://praza.gal/storage/uploads/luis-alvarez-250522-01-f9880ee.jpeg)