En plena campaña do PPdeG para desprestixiar as manifestacións contra o Goberno galego, o presidente di que mentres non haxa eleccións xerais "o que hai que facer é respostar na rúa" ao Goberno de España
O presidente da Xunta e do PPdeG, Alfonso Rueda, acudirá o vindeiro domingo á manifestación convocada polo presidente do PP estatal e ex-presidente da Xunta, Alberto Núñez Feijóo, contra a "mafia" coa que identifica o Goberno de Pedro Sánchez. Rueda considera, como Feijóo, que debera haber eleccións xerais canto antes e di que "mentres non as haxa o que hai que facer é respostar na rúa".
"Eu asistirei e espero que asistan moitas persoas", asegurou o presidente, en plena campaña do PPdeG para presentar á inversa manifestacións en contra da Xunta como "alboroto" que pretende "lograr o que non conseguiron nas urnas a través de esaxeración e conflitividade social".
Rueda foi preguntado sobre se comparte con Feijóo que Pedro Sánchez é un "capo" e o Goberno de España unha "mafia". "As cousas que estamos sabendo fan moi difícil pensar o contrario", dixo o presidente galego, evitando corrixir o seu líder.
A Rueda tamén lle preguntaron, na rolda de prensa posterior ao Consello da Xunta deste luns, se ante esta situación segue considerando a Sánchez un "interlocutor válido". Rueda reduciu nese punto o ton das súas críticas. "Non podo tirar a toalla, o meu deber é intentalo", dixo en referencia ás reiteradas peticións da Xunta ao Goberno central. O presidente galego admitiu que a Xunta seguirá tratando con Sánchez "mentres este goberno siga sendo o goberno do meu país".
