O presidente do Goberno de España pon o foco na concesión dun terreo público que vén de solicitar a Costas a parella de Feijóo
A concesión dun terreo público en Moaña entre o seu chalé e a praia que vén de pedir a parella de Alberto Núñez Feijóo, Eva Cárdenas, xa é motivo de debate a nivel estatal. Este mércores, na sesión de control ao Goberno de España no Congreso, o presidente Pedro Sánchez criticou que o PP estea a boicotear a Lei de Vivenda estatal e que só estea pendente de dúas vivendas, unha relacionada coa presidenta da Comunidad de Madrid, Isabel Díaz Ayuso, e outra o "chalé en Moaña con acceso privativo á praia".
Tras desvelar en exclusiva Praza.gal en novembro que Costas pretendía recuperar o uso público dun terreo do dominio marítimo-terrestre que está pechado conxuntamente co chalé que Cárdenas mercou en Moaña en 2019, esta vén de solicitar unha concesión ata 2037 sobre dita parcela. A pasada semana tanto o Concello de Moaña como o PSdeG avanzaron que van alegar contra esa solicitude e o ministro para a Transformación Dixital e da Función Pública, Óscar López, pediu a Feijóo "que se preocupe menos polo seu acceso á praia na súa casa" e que "aplique a Lei de Vivenda".
O PSdeG tamén levará ao Parlamento de Galicia o debate sobre a concesión solicitada por Eva Cárdenas
Ese mesmo argumentario foi replicado este mércores polo propio Pedro Sánchez no Congreso. A sesión de control comezou cunha pregunta de Feijóo a Sánchez sobre o benestar e a calidade de vida dos españois, un debate cara a cara no que nada se dixo do chalé de Moaña. Foi dez minutos despois, ante unha pregunta do deputado de EH Bildu Oskar Matute sobre medidas en materia de vivenda, cando Sánchez sacou a cuestión.
"Coincido que efectivamente necesitamos o concurso de todas as administracións, desgraciadamente hai partidos políticos que gobernan institucións que boicotean a Lei de Vivenda e que por certo só están pendentes de dúas vivendas, un ático en Chamberí e outra un chalé en Moaña con acceso privativo á praia", dixo o presidente en referencia ao ático de Ayuso e o chalé no que adoita descansar Feijóo.
Terreo público marítimo-terrestre que dá acceso á praia desde a casa de Eva Cárdenas en Moaña
-
Terreo que forma parte do dominio público marítimo-terrestre malia estar pechado de xeito conxunto coa propiedade de Eva Cárdenas -
Terreo público marítimo-terrestre que dá acceso á praia desde a casa de Eva Cárdenas en Moaña -
Porta de acceso á praia desde o terreo que Costas quere recuperar e que foi renovada cos mesmos materiais que o resto de portas e fiestras da casa -
Imaxe do Catastro, á esquerda, coa liña azul que delimita o dominio público marítimo-terrestre, e á dereita delimitación da parcela pública de 210 metros cadrados situada entre a propiedade privada de Eva Cárdenas e a praia -
Terreo que Costas quere recuperar para uso público e que serve de acceso directo á praia do chalé de Eva Cárdenas en Moaña
O debate sobre a concesión solicitada por Cárdenas tamén chegará ao Parlamento de Galicia, segundo anunciou este luns o PSdeG, que avanzou que incluirá a cuestión no próximo Pleno.
