O servizo provincial constata "a imposibilidade física de acceder a unha porción de 210 metros cadrados de dominio público" situados entre o mar e a propiedade na que adoita descansar o popular 

O Servizo Provincial de Costas de Pontevedra vén de iniciar un expediente de recuperación da posesión dun terreo de 210 metros cadrados pertencente ao dominio público marítimo-terrestre que na práctica está pechado de xeito conxunto co terreo privado que rodea o chalé que ten en Moaña Eva Cárdenas, parella de Alberto Núñez Feijóo, onde adoita descansar o líder popular en visitas a Galicia. O peche con muros do terreo público, que facilita un acceso directo á praia desde o terreo privado, foi realizado anos antes de que Cárdenas mercase a súa propiedade, pero a porta con pechadura que hai nel foi renovada recentemente cos mesmos acabados que o resto da vivenda.

Este diario púxose en contacto na mañá deste martes cunha portavoz autorizada de Feijóo para coñecer a súa valoración deste paso administrativo de Costas e saber se o líder popular empregou nalgún momento de xeito privativo ese espazo pechado malia ser dominio público marítimo-terrestre. Ata o momento non hai resposta.

O anuncio oficial para a recuperación para o uso público do terreo en cuestión aparece publicado no Boletín Oficial del Estado deste martes 5 de novembro. Nel indícase que o Servizo Provincial de Costas, dependente do Ministerio para a Transición Ecolóxica, constatou "a imposibilidade física de acceder a unha porción de aproximadamente 210 metros cadrados de terreos de dominio público marítimo-terrestre (PDMT), na contorna da praia de O Con, no termo municipal de Moaña". "Dito acceso está impedido, ao nordeste, por un muro transversal ao DPMT de bloques de formigón de aproximadamente 5 metros e medio de longo, e ao sur, por un muro de contención que conta cunha porta de acceso pechada".

O terreo en cuestión, identificado como público tanto no deslinde marítimo-terrestre como no Catastro, é unha franxa duns 25 metros de longo por 8 de ancho situada nun nivel intermedio entre a praia e o terreo privado con casa que Cárdenas mercou en 2019. Segundo contaba daquela Faro de Vigo, cuxas imaxes permiten comprobar o estado previo das portas e fiestras, a vivenda mesmo contaba "con saída ás rochas". Pero esa saída forma parte do terreo público que agora Costas quere recuperar, un espazo axardinado con céspede e árbores coidadas que en apariencia é unha continuidade do terreo privado.

A porta que pecha o acceso ao espazo público foi renovada recentemente cos mesmos materiais e acabados que o resto da vivenda

O trámite agora iniciado por Costas é similar a outros que o mesmo departamento impulsa noutras localidades da mesma provincia como Cangas ou Pontevedra para recuperar o uso público de antigas construcións das que xa non hai constancia de quen as levantou en terreos que a Constitución establece que deben ser públicos pola súa proximidade ao mar. 

Fontes coñecedoras do caso sinalan que o peche do terreo público co muro de contención e a porta de acceso á praia habilitada nel foron instalados moito antes de que en 2007 se aprobase o deslinde marítimo-terrestre e de que Cárdenas mercase a propiedade privada anexa en 2019. En todo caso, a porta que dá acceso á praia, renovada cos mesmos materiais, acabados e cores que a reforma do resto da vivenda realizada cando a adquiriu Cárdenas, como constatan en Costas, é a que fai, segundo salientan fontes técnicas dese departamento, que o terreo público teña un uso privativo e que só se poida acceder a el desde o terreo privado. 

"Como constatamos que é dominio público e entendemos que hoxe non hai dereitos transitorios, decídese recuperar a posesión", explican fontes técnicas de Costas

Fontes de Costas tamén matizan que nalgún momento sobre o terreo en cuestión puido haber "dereitos transitorios" tras o deslinde marítimo-terrestre, pero posteriormente "renunciouse a eses dereitos transitorios". "Como constatamos que é dominio público e entendemos que hoxe non hai dereitos transitorios, decídese recuperar a posesión", explican.

O expediente agora iniciado por Costas pretende recuperar a posesión do terreo para demoler os peches nel existentes e garantir o uso público do litoral nunha zona que hoxe é de difícil acceso, como se está a facer noutros lugares. Para iso, agora "calquera persoa interesada" ten oito días para "examinar o expediente" e "alegar canto estime conveniente", segundo se sinala no BOE. Porén, este diario desprazouse este mesmo martes á sede do Servizo Provincial de Costas en Pontevedra para consultar ese "expediente" e a resposta que obtivo dos técnicos dese organismo é que non hai nada que consultar xa que o expediente iníciase formalmente co trámite de incoación agora publicado no BOE.