Un ex-monarca en paradoiro descoñecido a efectos oficiais e políticos. O presidente do Goberno de España, Pedro Sánchez, compareceu este martes ante a prensa tras a reunión do Consello de Ministros na que noutro momento sería unha rolda de prensa ordinaria no remate do curso político, previa á pausa vacacional. A intervención do líder socialista estivo marcada pola xestión da crise do coronavirus pero, como era de agardar, as preguntas da prensa xiraron sobre todo en torno á marcha de España de Juan Carlos I en pleno aluvión de escándalos financeiros.
"Non se xulgan institucións, xúlgase ás persoas", di Sánchez, quen considera que a Casa Real "marca distancias sobre unha serie de condutas que poden ser susceptibles de cualificarse como irregulares"
Unha vez confirmada a fuxida, multiplicáronse os interrogantes sobre o destino do monarca emérito. Diversas informacións sitúano entre Portugal e a República Dominicana e, ao ser cuestionado ao respecto, Sánchez dixo "non ter a información". Fíxoo, como informan Íñigo Aduriz e Aitor Riveiro para eldiario.es, nunha intervención marcada pola defensa da institución monárquica: "Non se xulgan institucións, xúlgase ás persoas", recalcou.
A xuízo de Sánchez, "o máis importante" non é onde se atopa quen foi xefe do Estado dende 1975, tras a morte do ditador que o designara como sucesor, e a abdicación de 2014. O relevante, coida o presidente do Executivo, é que "dixo que se pon á disposición da Fiscalía e da Xustiza" no caso de ser reclamado nos casos que se están a investigar, como o dos presuntos cobramentos de comisións a cambio de xestionar contratos para empresas ferroviarias españolas en Arabia Saudita.
Neste sentido, nun clima de aberta tensión co seu socio de Goberno, Unidas Podemos -a formación que encabeza Pablo Iglesias asegura que non soubo do que ía acontecer ata que sucedeu-, Pedro Sánchez ve axeitado que Juan Carlos de Borbón decidise marchar. "España -reflexiona- necesita de estabilidade e de institucións robustas" que fagan gala de "exemplaridade, transparencia e rexeneración". Por iso ve "adecuada" a "liña marcada pola Casa Real" nun contexto no que, advirte, "o Goberno que eu presido considera plenamente vixente o pacto constitucional".
Pedro Sánchez evita tamén concretar o papel xogado polo seu Goberno na decisión anunciada o pasado luns -"os asuntos dos despachos entre o xefe do Estado e o presidente do Goberno son discretos e confidenciais"-, sen ben admite a súa intención. A "decisión que toma a Casa Real", matizou, "marca distancias sobre unha serie de condutas que poden ser susceptibles de cualificarse como irregulares"
Dende Galicia a Portugal... E á República Dominicana?
Mentres o Goberno de España nega saber onde está o ex-xefe do Estado, diversos medios coinciden en que Juan Carlos de Borbón estivo a pasada fin de semana en Sanxenxo, onde pasou longas temporadas nos últimos anos, e que dende alí partiu cara a Portugal. Así, por exemplo, a portuguesa TVI situouno en Cascais o propio luns, concretamente en Estoril, onde estiveran exiliados os seus pais.
O xornal Público indica que o actual rei tratou con Rebelo de Sousa "o futuro de Juan Carlos" nun encontro secreto en Madrid
O xornal portugués Público di ter confirmado que o pasado 18 de xullo Juan Carlos de Borbón xa estivera en Portugal e dous días despois, o presidente da República portuguesa, Marcelo Rebelo de Sousa, viaxou a Madrid "sen comitiva" para atoparse con Felipe VI, ademais de visitar o Museo do Prado. "Os dois chefes de Estado discutiram então a questão do futuro de Juan Carlos", sinala o Público.
Na tese da estancia en Portugal coincide tamén El Confidencial, xornal que este martes asegura que o anterior xefe do Estado ficou "instalado" en Azeitão, preto de Setúbal, acollido por unha familia de nobres, os Brito e Cunha-Espírito Santo. Outros medios, non obstante, aseguran que a presenza de Juan Carlos de Borbón en Portugal sería transitoria. Segundo o ABC, o plan do monarca pasaba por voar dende o Porto á República Dominicana e alí instalarse nun complexo turístico de luxo propiedade da familia Fanjul, "unha coñecida familia cubana afincada en Miami que fixo fortuna grazas ás plantacións de azucre", segundo La Vanguardia.