A investigación oficial do accidente mortal do Silvosa ocorrido no Nadal de 2018 instou a "non demorar" a mellora da seguridade do peirao, pero Portos de Galicia segue sen decidir sequera que actuación acometer

O 20 de decembro de 2018 o pesqueiro Silvosa afundiu na perigosa canle de acceso ao porto de Muxía. Os tres mariñeiros que estaban en cuberta lograron saltar ao peirao, pero o patrón, moi experimentado, quedou atrapado dentro da ponte e faleceu. A investigación oficial do sucedido concluíu dous anos despois instando a Portos de Galicia "a non demorar a conclusión dos estudos iniciados e a execución das obras resultantes" para mellorar a seguridade do porto, pero seis nadais despois daquel accidente o ente público dependente da Xunta segue sen contar aínda sequera cunha decisión sobre que actuación acometer. E tampouco prevé tomala en breve.

A investigación oficial do afundimento do Silvosa salientou que é habitual que no porto de Malpica se rexistren ondas de gran lonxitude e período, "trens de ondas que se propagan ao interior do porto" e que poden afectar ao nivel da canle de entrada e saída do mesmo, protexida por unha comporta. O día do accidente “as condicións das ondas e correntes xeradas no fondo do porto e na canle de acceso á dársena interior supuñan risco para a navegación pola canle", elemento que se uniu a que o patrón achegouse á canle pola zona máis afectada polas correntes e remuíños, o que fixo que a embarcación quedase "encaixada e á mercede da forte corrente, que a fixo envorcar".

As correntes, para as que segue sen haber solución, atravesaron o barco na canle de saída do porto e afundírono, deixando o patrón atrapado

O documento incide en que os patróns deben empregar un determinado rumbo para saír do porto evitando a zona máis perigosa. Pero tamén di que "debería realizarse un estudo das ondas no porto por parte de entes técnicos especializados”, e tras constatar a intención da Xunta de facelo os investigadores remataron sinalando que "á vista das accións tomadas por Portos de Galicia a consecuencia deste accidente, non se formulan recomendacións de seguridade, máis alá de instar a este organismo a non demorar a conclusión dos estudos iniciados e a execución das obras resultantes”.

Cando a investigación oficial se fixo pública, dous anos despois do afundimento, Portos de Galicia viña de activar un "método experimental" de previsión de correntes no porto de Malpica, unha "alternativa provisional ao traballo técnico que Portos de Galicia segue a realizar para definir unha solución definitiva ao problema de axitación na dársena”. Pero as actuacións de Portos en Malpica non pasaron desde aquela dos estudos sobre as ondas, sen concretarse aínda unha solución para os seus problemas.

Portos cifra en oito as posibles solucións xa estudadas, aínda ningunha implantada, e en 3 millóns o xa gastado en estudos

O pasado xuño o presidente de Portos respondeu no Parlamento a unha pregunta sobre os problemas de Malpica asegurando que o seu ente "continúa traballando para definir unha proposta técnica de actuación que sexa viable e permita reducir a axitación e o efecto das correntes no porto actual". Facíao ao tempo que trasladaba á confraría local parte da responsabilidade por formular novas alternativas e cifraba en oito as posibles solucións xa estudadas, aínda ningunha implantada. 

Un mes despois era o propio conselleiro do Mar, Alfonso Villares, o que visitaba Malpica e volvía publicitar os estudos que a Xunta leva realizando desde hai seis anos aínda sen resultados prácticos e cuxo investimento acumulado cifrou xa en 3 millóns de euros.

Ante o sexto aniversario do afundimento mortal, Praza.gal preguntou a Portos pola situación actual en Malpica e a súa resposta é que "non hai unha solución técnica aínda pechada" e tampouco se prevé tela en breve. O ente público salienta que "se avanzou moito en coñecemento" sobre o "fenómeno extraordinario" que supón o tipo de axitación do mar que se produce en Malpica, que "non se tiña en conta nos portos galegos". Pero seis anos despois do accidente e catro despois de que os investigadores do mesmo reclamasen "non demorar" a mellora do porto, Malpica segue agardando unha solución.