A Xunta di que o resto de áreas costeiras de Galicia "seguen en situación de normalidade, cunha ocupación dos encoros do 75,90%, un 4,78% inferior á media dos últimos 10 anos, a pesar da falta de precipitacións"
O pasado 7 de agosto a Oficina Técnica da Seca da Xunta activou a situación de prealerta por escaseza moderada de auga nos sistemas do río Lérez, en Pontevedra, e do río Grande, en Camariñas, e decidiu aplicar medidas equivalentes a un escenario de prealerta, pero sen chegar a declarala, no subsistema de Baiona. En total eran medidas que afectaban a 20 concellos. Este venres, nunha nova reunión, a oficina decidiu manter o mesmo nivel neses concellos e reforzar a vixilancia noutros 5 abastecidos desde o río Anllóns.
A situación de prealerta recomenda aos concellos afectados minimizar os consumos municipais de auga que non sexan esenciais, como baldeo de rúas, rego de parques e duchas nas praias, ademais de pedir á poboación que faga o mesmo coas súas actividades particulares. Esa situación estaba declarada e mantense nos concellos de Barro, Bueu, Campo Lameiro, Cerdedo-Cotobade, A Estrada, Forcarei, Marín, Meaño, Moraña, Poio, Ponte Caldelas, Pontevedra e Sanxenxo, no caso da unidade territorial do río Lérez; e Cabana de Bergantiños, Camariñas, Laxe, Muxía, Vimianzo e Zas, pertencentes á conca do río Grande. Ademais, no caso de Baiona, tamén se aplican "medidas equivalentes" sen que se declarase formalmente a prealerta.
Ademais de manter esa situación, este venres decidiuse "realizar durante as vindeiras semanas un seguimento para ver a evolución da unidade territorial do río Anllóns tras detectar unha baixada no valor do indicador de escaseza". Esa vixilancia afectará aos concellos de Carballo, Coristanco, A Laracha, Malpica de Bergantiños e Ponteceso.
Sanidade reforzará o control da auga de consumo humano nos concellos afectados por incendios
A falta de chuvia, a calor e a presión turística son os principais factores detrás da actual situación, que a Xunta aínda non considera preocupante. Segundo di o Goberno galego, o resto de unidades territoriais da demarcación hidrográfica Galicia- Costa "seguen en situación de normalidade, cunha ocupación actual dos encoros de abastecemento do 75,90%, sendo un 4,78% inferior á ocupación media dos últimos 10 anos, a pesar da falta de precipitacións nas últimas semanas".
Por outra banda, relacionado co consumo humano e os incendios, a Consellería de Sanidade está a elaborar un plan reforzado de control das augas de abastecemento para garantir a súa salubridade nos concellos máis afectados polo lume.
